Күһүн саамай кэрэ, көмүс мөһүүрэлэринэн күлүмнүүр күнүгэр, балаҕан ыйын 9-гар, Тиит Эбэ килбэйэр киинигэр Түмэл дьиэтигэр «Сарыал» култуура киинин үлэһиттэрин тэрийиитинэн «Күһүн күлүм түгэннэрэ» диэн тэрээһин буолан ааста. Бырагыраамабыт нэһилиэкпит кэрэ куоластаах ырыаһыттара кыттыылаах «Күһүҥҥү долгураҥ» кэнсиэринэн саҕаланна. Манна өрөспүүбүлүкэтээҕи, улуустааҕы ырыа толорооччулар күрэхтэрин кыайыылааҕа Хоточчу кэрэ куоластааҕа Петр Пестерев, быйылгы сезоҥҥа култуура киинигэр үлэтин саҕалаабыт Фаина Готовцева, ырыа алыптаах кэрэ дуэттар Валентина Яндреева, Ольга Попова, уһуйаан иитиллээччилэрин музыка эйгэтигэр үөрэтэр Анастасия Борисова, сэлиэнньэ кэрэ кыргыттара «Күбэйэ» бөлөх кытыннылар. Дьэ ол кэннэ сэлиэнньэбит биэс түөлбэлэрэ кыттыылаах фотозоналары көрүү буолла. Манна баар этэ бииртэн биир кэрэ көстүү, киһи тылынан хоһуйбат сэлиэнньэ хаһаайкалара биэбэйдээн үүннэрбит араас оҕуруот аҺа, киһи хараҕын сылаанньытар дьикти кэрэ сибэккилэр.
Көрүү — күрэх кыайыылааҕынын «Кэндэлики» ааттанна. Ону таһынан «Ой Кэккэ» (сал.А.Д.Максимова), «Сайдыы» (сал.Д.С.Егорова), «Туойдаах» (сал.Н.Д.Яковлева), «Орто сайылык» (сал.Л.И.Данилова) оҥорбут фотозоналара ааттарыгар сөп түбэһэр номинацияларга тигистилэр. Бары түөлбэлэр »Сарыал» култуура киинэ олохтообут бириистэринэн бэлиэтэннилэр.
Тэрээһиммит биир кэтэһиилээх оонньуутунан «Эн — миэхэ, мин — эйиэхэ» оонньуу буолла. Дьэ манна дьоммут аҕалбыт бириистэрэ арааһын киһи сөҕөр. Эр дьоммут байанайдара биэрбит булдуттан кус диэн, балык диэн, аны туран хаһаастаах хаһаайкаларбыт малина барыанньатыттан саҕалаан тыыннаах хоруолукка тиийэ. Онон бары илии тутуурдаах тарҕастылар. Аны таһырдьа тахсан уолаттарбыт биллэр түөлбэлэринэн мини-футболга күрэхтэстилэр. Күрэҕи спорт инструктара О.Б.Очиржапов тэрийэн ыытта.
Кыайыы өрөгөйүн «Орто сайылык» түөлбэ уолаттара биллилэр, иккис — «Кэндэлики», үһүс — «Сайдыы» түөлбэ. Ити курдук түмсүүлээх Тиит Эбэ сэлиэнньэ түөлбэлэрин олохтоохторо күһүҥҥү тэрээһиҥҥэ, төһө да сололоро суох буоллаллар, кэлэн кыттан, сүргэлэрэ көтөҕүллэн тарҕастылар.
Анастасия Мордовская