Балаҕан ыйын 15 – 24 күннэригэр Дьокуускайга өрөспүүбүлүкэтээҕи агропромышленнай «Продовольствие — 2023» быыстапка-дьаарбаҥка буола турар.
Быйыл кыттааччы аҕыйах курдук. Урукку кэмнэргэ Комсомольскай болуоссакка атыыһыттар баппат үлүгэр буолаллара. Ол иһин да буолуо хорчуоппаларга уочарат бөҕө. Сүрүннээн сибиэһэй балыкка дьон тоҕуоруһар.
«Туймаада» агрохолдинг, быйыл лаппа сайдыбытын көрдөрдө, 9 тыа хаһаайыстыбатын тэрилтэлэрин түмэн күргүөмнээхтик кытынна. Олор истэригэр биллиилээх шеф-повар Николай Атласов араас саҥа аһы атыыга таһаарда:
— Мин бүгүн дьарбаҥкаҕа уулуссаҕа тута сылдьан сиир сахалыы астары аҕаллым. Норуокка сибиэһэй, минньигэс, чэпчэки сыаналаах ас хайаан да тиийиэхтээх. Араас улуустар астарын үөрэтэн бу «фас-фут» тэрийдим. Маннык астаах будка куоракка киин ууллуссаҕа турар. Будканы анаан Саха сирин тыйыс тымныыларын,50 кыраадыһы, тулуйар гынан «Технопаарка» уолаттара оҥорбуттара. Өбүгэлэрбит урут үксүн таһырдьа астарын астыыллара, ол иһин маннык бэйэбит бородууксуйабыт хайаан да баар буолохтаах. Сотору Москва куоракка ВДНХ быыстапкатыгар баран эмиэ бу астары көрдөрүөхтээхпит. Онон биһиги аспыт култууратын атын да сирдэргэ билиэхтэрэ, биһириэхтэрэ, – диэн Николай кэпсиир. Николай дьаарбаҥка чэрчитинэн астарын амсатыытыгар ыҥырар. Манна эт арааһын, ойоҕоһу, халбаһыыны ыһаарылаан бэлэмниэ. Бары кэлэн амсайаргытын күүтэрин эттэ.
Онтон салгыы хаҥаластарбын көрдүү бардым уонна «Ок-Сиэ» хампаанньа хорчуоппатыгар тиийдим. Манна да син уочаратттаах эбит, «Ок-Сиэ» аһын-үөлүн билбэт киһи суоҕа буолуо. Үүт ас арааһын эрэ буолбакка атын бородууксуйаны эмиэ атыыга аҕалбыттар:
— Сүмэһинигэр буспут ынах этин биир бааҥката 200 солкуобай. 70% дьиҥнээх ынах этинэн оҥоһуллар. Былырыын манна анаан анал тэрил ылбыппыт уонна кэмсиммэппит. Бородууксуйа арааһа элбэх буолара инники сайдыыны көрдөрүү. Сыыр аҕыллыбыт, Кыһыл Үрүйэ хороҕор муостаахтарын үүттэриттэн итальянскай ситиминэн оҥоһуллар. Дьиҥэр сыыр оҥоруутун үс сыл анараа өттүттэн саҕалаабыппыт, хас сылын аайы тупсаран иһэбит. Сибиэһэй сыыр тахсар кэмэ сайын уонна күһүн. Тоҕо диэтэххэ, бу эрэ кэмҥэ сүөһү үрдүк сыалаах үүтү биэрэр. Хаачыстыбалаах сыыры оҥорорго бу сүрүн ирдэбилбуолар. Атыыга сыыры от ыйыттан саҕалаан таһаарабыт, – диэн «Ок-Сиэ» хампаанньа сүрүн технолога Татьяна Никифорова билиһиннэрдэ.
Тыа хаһаайыстыбатын быыстапка-дьаарбаҥкатыгар «Үрдүк хаачыстыбалаах ас-үөл бородууксуйатын оҥорон таһаарыы иһин» күрэх ыытыллар, түмүк 10 күн түмүгүнэн биллиэҕэ. Онон өссө да сибиэһэй аһы чэпчэки сыанаҕа ылыан баҕалаахтар кэлэн атыылаһыаххытын сөп.
Татьяна Владимирова