Бу бастакы дзюдоҕа өрөспүүбүлүкэтээҕи Доҕордоһуу матчевай күрэҕэр Монголияттан дойду сүүмэрдэммит хамаандата кэлэн кытынна уонна 11 күөн көрсүһүүлэргэ 6-4 очукуону ылан кыайыыны ситистэ. Биирдиилээн киирсиигэ бастаатылар: Д. Номинэрдэнэ, Б. Суманхүлэг, Б. Буянбэлэг, Б. Буянхишиг, Алтанабагана, Покровскайтан Кирилл Олесов.
— Билиһиннэрэр буоллахха, Шагдар Гансух аан дойду кылаастаах спорт маастара, биһиги Олимпийскай резервэҕэ өрөспүүбүлүкэтээҕи олимпийскай эрэллэргэ училище Покровскайдааҕы спортивнай оскуолатыгар тириэньэринэн үлэлээбитэ хаһыс да сыла, элбэх улахан аан дойдутааҕы, Европа, Россия күрэхтэһиилэрин кыайыылаахтарын иитэнтаһаарда, — диэн кэпсээтэ Спортивнай оскуолабыт дириэктэрэ Александр Куприянов, — Шагдар Гансух буиннинэ Монголия сүүмэрдэммит хамаандатын тириэньэринэн үлэлээбитэ. Кини спорт бу көрүҥэр аан дойдутааҕы 3-с даннаах курун хаһаайына буолар, Монголия «Хотугу Сулус» уордьанын кавалера, дойдутун Олимпийскай кэмитиэтин мэтээлинэн бэлиэтэммит улахан спортсмен. Кини «Азия оҕолоро» аан дойдутааҕы Спортивнай оонньууларга үксүгэр эппиэтинэстээх тириэньэринэн үлэлээбитэ, СӨ джиуджитсуга уоннакурдаһан тустуутугар старшай тириэньэрэ этэ. «Хотой» спорт илиҥҥи бойобуой искусствоҕа Кииммит тириэньэрэ Хаҥалас улууһун уонна Монголия Ченгелтэй аймак доҕордоһууларынан үлэ биир көхтөөх тэрийээччитэ буолар. Кини элбэх аан дойдутааҕы таһымнаах сэминээри, маастар-кылааһы, күрэхтэһиилэри ыыппыт киһи. Россия ДОСААФ тэрилтэтин Монголияҕа официальнай бэрэстэбиитэлэ. «Азия оҕолоро» оонньууларга кыттар саастаах спортсменнарга үгүс күрэхтэһиилэри тэрийэн кэллэ. Билигин кини аныгыскы Оонньууларга ыччаттарбытын бэлэмнии сылдьар киһибит буолар. Ситиһиилэри күүтэбит.
Бу ааспыт матчевай турнир үөрүүлээх арыллыытын тэрээһинигэр «Хотой» киин иитиллээччилэрэ кытыннылар, аан дойду кылаастаах дзюдоистар бырахсыыларын көрөн элбэххэ үөрэннилэр, улахан уопуттаах спортсменнары кытары көрсүһүүттэн үгүһү биллилэр. Ити барыта үүнэн эрэр спортсменнарбыт «Азия оҕолоро» оонньууларыгар ситиһиилээхтик кытталларыгар төһүү буолара саарбаҕа суох.
Людмила АММОСОВА.