Оруобуна биир ый анараа өттүгэр, Россиятааҕы киинэ күнүн көрсө, өрөспүүбүлүкэҕэ “Экстра Синема” саха хампаанньата оҥорбут сыыппара платформатыгар холбоммут 15 киинэ саалатын аһыллыыта буолбута. Бэлиэ күн Ил Дархан Айсен Николаев уонна хампаанньа дириэктэрэ Петр Чиряев саҥа киинэ саалаларын үөрүүлээх быһыыга-майгыга арыйбыттара. Биһиги улууспутугар маннык киинэ тыйаатыра Булгунньахтаахха үлэлээн саҕалаабыта, олохтоохтор киэҥ экраннаах саалаҕа киинэ көрөр кыахтаммыттара.
Киинэ тыйаатырдаах «Дьиэрэй ырыа» Култуура киинин дириэктэрэ Татьяна Ефремова бэлиэтээбитинэн, эрдэ, суол-иис баар буолан, олохтоохтор Покровскайга, Дьокуускайга баран киинэ көрөр эбит буоллахтарына, билигин ханна да айаннаабакка кулуупка кэлэн киинэ көрөн, сынньанан бараллар.
— Көрөөччү ахсаана элбэх, аҕыйах диир кыах суох. Мантан инньэ дьон сылдьа үөрэннэҕинэ өссө элбэх көрөөччү мустуо дии саныыбын. Соторутааҕыта «Лоокуут уонна Ньургуһун» премьератын күн саала улахан аҥара туолбута, — диир Татьяна Геннадьевна.
Надежда Кононова, Булгунньахтаах орто оскуолатын алын сүһүөх кылаастарын учуутала:
— «Экстра Синема» киинэ тыйаатырын арыллыытыгар үөрэнээччилэрбин кытта сылдьыбыппыт, «Бүгүн-былыр» киинэни көрбүппүт. Онтон ыла нэдиэлэ аайы киинэ көрүүтэ саҕаламмыта.
Кассаҕа кэлэн эбэтэр онлайн билиэти атыылаһарга миэстэни талан ыларыҥ олус табыгастаах. Мин киинэҕэ сылдьарбын, киинэ көрөрбүн наһаа сөбүлүүбүн.
Дьокуускайга эбэтэр атын сирдэргэ да бардахпына киинэҕэ куруук сылдьабын. Киинэ көрөргө оҕобун эмиэ сыһыарбытым. Хас көрбүт киинэбитин ырытабыт, туох табыллыбытын, табыллыбатаҕын быһаарсабыт. Итинник кэпсэтии киһи билиитин-көрүүтүн кэҥэтэр, бодоруһарга, атын киһи санаатын ылынарга үөрэтэр.
Биһиги киинэ тыйаатырбытыгар премьернай көрдөрүүлэр саҕаламмыттара үөрдэр. Ол курдук, Тимофей Сметанин уонна Дьүөгэ Ааныстыырап айымньыларын матыыбынан уһуллубут «Лоокуут уонна Ньургуһун» киинэ көрүүтүгэр бэтэрээн-учууталларбытыгар билиэт ылбыппыт. Ытык дьоммут кулуупка кэлэн киинэ көрөн, сынньанан, алтыһан барбыттара, махтал тылларын эппиттэрэ. Онон, киинэ тыйаатыра арыллан нэһилиэк олохтоохторун сэргэхситэр дии саныыбын.
Бэлиэтээн эттэххэ, «Култуура» национальнай бырайыак чэрчитинэн үбүлэнэн тарҕанар “Экстра Синема” өрөспүүбүлүкэҕэ 2022 сылтан үлэлиир, былырыын 10, быйыл 17 киинэ саалаларын арыйда.
Ольга Гермогенова.