Төхтүр нэһилиэгин «Эркээни» Култуура киинин көҕүлээһининэн «Дьүөгэ» эбээлэр түмсүүлэрэ Учуутал күнүгэр анаан уонна Аҕам саастаахтар декадаларын чэрчитинэн «Истиҥ иэйиини бэлэхтии» диэн дьоро киэһэни бэлэхтээтилэр.
“Дьүөгэ” — нэһилиэкпит биир бастыҥ общественнай түмсүүтэ быйыл тэриллибитэ 12 сылыгар барда. Бу сыллар усталарыгар «дьүөгэлэр» нэһилиэккэ, улууска, өрөспүүбүлүкэҕэ ыытыллар араас тэрээһиннэргэ, хамсааһыннарга көхтөөхтүк кытталлар, элбэх ситиһиилэринэн үөрдэллэр. Түмсүүгэ 20-чэ эбээ бэйэлэрин баҕаларынан сылдьаллар. Түмсүү иһигэр араас сылларга нэһилиэкпитигэр үлэлээбит бэтэрээн учууталларбыт, олохтоох уһуйааммыт бэтэрээннэрэ, тыа хаһаайыстыбатыгар, култуура эйгэтигэр үлэлээбит, үлэлии сылдьар убаастанар дьоннорбут бааллар. Бу күн кэнсиэрт иннинэ үөрүүлээх чааска Төхтүр орто оскуолатын кэлэктиибэ Учуутал күнүнэн эҕэрдэлээтилэр, истиҥ баҕа санааларын эттилэр, бэлэхтэрин туттардылар. Олохтоох дьаһалта, ” Кэнчээри” уһуйаан, “Хахсык” ТХКП ,”Эркээни” КК ааттарыттан бу күн «дьүөгэлэргэ» истиҥ иһирэх тыллар, эҕэрдэ суруктар туттарылыннылар.
Кэнсиэрт бииртэн биир ураты нүөмэрдэрэ, сыанаҕа тутта-хапта сылдьаллара, таҥастара-саптара көрөөччүлэри сөхтөрдө. Хас биирдии нүөмэрдэригэр ураты болҕомтону ууран, кыһаллан бэлэмнэммиттэрэ кэнсиэрт уопсай туругун тупсарар, манна үҥкүүлэрин хореограф идэлээх култуура бэтэрээнэ, дьиҥнээх ускуустуба маастара Светлана Иванова үҥкүү хас биирдии хамсаныытын оҕуруо курдук тиһэн, ураты суолталаан чочуйан туруорбута дьон сүргэтин көтөхтө. Махталлаах көрөөччүлэрбит сылаас ытыстарын тыаһыгар уйдаран, олус истиҥ иһирэх киэһэни түстээтилэр.
“Дьүөгэ” түмсүүгэ баҕарабыт бу курдук олохтон үөрэн, бар дьоҥҥо куруук бастыҥ холобур буола тураргытыгар, айар талааҥҥыт арыллан истин, тус бэйэҕитигэр, дьиэ кэргэттэргитигэр дьол-үөрүү тосхойдун, чэгиэн-чэбдик сылдьыҥ диэн баҕа санаабытын тиэрдэбит!
А.И.Борисов аатынан «Эркээни» КК үлэһиттэрэ.