Биһиги бэтэрээммит Александра Петровна 95 хаарыгар үктэннэ. Дьоһун саас! Киһиэхэ эрэ бэриллибэт саас. Эҕэрдэлиибит!
Тулаайах аҥардаах иитиллибит киһиэхэ үтүө бэлэх. Ийэтэ эрдэ өлөн аҕатыгар иитиллибит. Оҕо сааһа III-с Маалтааныга ааспыт. Аҕата холкуоска биригэдьиир этэ, бултуура.
Александра оҕо сааһыттан холкуос үлэтигэр кыттыбыта, от оттоон, бурдук быһан. Ахсыс кылаас кэнниттэн оройуоннааҕы Сэбиэккэ тыа хаһаайыстыбатын салаатыгар машинискалаабыта, онтон архыып сэбиэдиссэйинэн, страховой агенынан үлэлии сылдьан баран 1963 сыллаахха оройуон хаһыатыгар машинисканан, бухгаалтырынан бочуоттаах сынньалаҥҥа барыар диэри үлэлээбитэ.
Улууспут хаһыатыгар үлэлээбит суруналыыстары, ол иһигэр суруйааччы, редактор Исай Никифоровы кытары күннэтэ алтыспыт киһи буолар.
Александра Петровна олоххо көхтөөх киһи. Норуот сэтээтэлинэн, идэлээх сойуус актыыбынай чилиэнинэн буолара, араас оҥоһуктарынан быыстапкаларга кыттара. Кэргэнэ Степан Кузьмич Никифоров улууспут хаһыатыгар кэрэспэдьиэнинэн, фотограбынан үлэлээбитэ. Кини Аҕа дойду Улуу сэриитин кыттыылааҕа этэ, эдэрчи сааһыгар олохтон баран Александра Петровна биэс оҕотун соҕотоҕун атахтарыгар туруорбута. Билигин ыччаттарын кытары олорор дьоһун эбээ – көрүү-харайыы бөҕөлөр. Маннык көстүү ыал аайы баар буолбата биллэр. Онон бэтэрээммит дьоллоох киһи.
Үбүлүөйдээх күнүнэн Александра Петровнабытыгар баҕарыаҕыҥ кытаанах доруобуйаны, санаатын хоту ыччаттарыгар, дьиэ кэргэнигэр, нус-хас олоҕу.
Людмила МОРДОВСКАЯ.