Мин 1994 сылтан Нөмүгү Сэбиэтин исполкомун бэрэссэдээтэлинэн саҕалаан үлэлээбитим. Зоя Васильевна оройуоннааҕы Сэбиэт исполкомун салайара. Кини үлэбэр улаханнык көмөлөспүтүн умнубаппын.
Нөмүгү суола ол саҕана куһаҕана. Күһүн, саас, сайын ардах түстэҕинэ тиэхиньикэ сылдьыбат этэ. Ону, мин саҥа үлэлээн иһэн, кэргэним Дмитрий Данилов көмөтүнэн ОПХ туох-баар тиэхиньикэтин таһааран хонтуорабыт, оҕо уһуйаанын иннин, Ленин уулуссаны гравийынан куттаран тэҥнээн кэбиспиппит. ОПХ дириэктэринэн ол саҕана Иван Захаров үлэлээбитэ. Ону ыйыппакка, сөбүлэспэккэ оҥоттордоҕум дии. Ыстарааптаммытым, 2000 солк., ол саҕанааҕы харчынан элбэх этэ. Ити саҕана Сэбиэккэ 2 солк. ыал аайыттан сылга ис түһээн диэн баара. Онон кыайан төлөөбөт буолан Зоя Васильевнаҕа сайабылыанньа суруйан киирбиппэр төлүүрбэр көмөлөспүтэ. Дьиссипилиинэ кэспиппэр быыгабар биэрбиттэрэ гынан баран көмөтүгэр билиҥҥэ диэри махтанабын.
Ол саҕана Музыкальнай оскуоланы аһарбар көмөлөспүтэ. Оҕо саада кыараҕас буолан оҕолорбут баппакка Селекционнайга нэдиэлэ устата оҕо сылдьар бөлөҕүн аһарбар көмөлөспүтэ. Нэһилиэк ыаллара сөбүлээбэтэхтэригэр бэйэм төрөппүт оҕом Левам бөлөҕүн илдьэн сырытыннарбытым. Кэлин суол оҥоһуутун (бульдозерынан олоро сылдьаммын) Ленин уулуссатын көнө гына эргэ тутуулары көтүрэ-көтүрэ оҥотторбутум. Салгыы ОПХ салалтата сыл аайы суолу оҥорон буолбута. Ол курдук, Валерий Никифоров суоппар салайааччылаах фермаҕа, Маалтааныга барар суоллары Тэппэнээҕи ааһа оҥорбуттара. Иван Дмитриевиһим курдук агроном идэлээх буолан дэриэбинэбитин күөх мастары олордорго сүбэлэһэн ОПХ исписэлиистэрэ, дьокутааттар салайааччыларынан хас ыал күрүөтүн маһын столяркаҕа Иван Никифоров салалтатынан оҥорон ыал аайы түҥэппиппит. Ол оҥоһуллубутун кэннэ анал тиэхиньэкэ туруоран нэһилиэк бүттүүн тахсан мас олордута саҕаламмыта. Үгүс ыалларга мастара үүммүттэрэ. Комбыт тэрийэрбитигэр Зоя Васильевна эмиэ көмөлөспүтэ.
Киниэхэ пааматынньык оҥорбуттарыгар үөрбүтүм аххан гынан баран, турар сирин сөбүлээбэтэҕим. Болуоссат оҥорон бүтэрэн эрэр сирдэригэр Зоя Васильевна пааматынньыгын аҕалан итиннэ туруорар буоллар ордук этэ. Ол иһин оройуон, нэһилиэктэр олохтоохторо өйүөхтэрэ, мин курдук ахтыы суруйан туруорсуохтара диэн олус эрэнэн суруйдум.
Ульяна ДАНИЛОВА.