Наука дьоҕус Академиятын уонна Ай-ти салаа сайдыытыгар Ассоциация тэрээһининэн, СӨ бырабыыталастыбатын, «Үүнэр көлүөнэ» фондатын уо.д.а көмөтүнэн «AccelProIT» оскуола бырайыактарын акселераторын «IT-bootcamp» симиэнэтэ буолан ааста.
11 хонук иһигэр өрөспүүбүлүкэ араас улуустарыттан 49 оҕо мустан 12 хамаанданан бэйэлэрин бырайыактарын чочуйан үлэлээтилэр.
Алтынньы 19 күнүгэр 7 хамаанда экспертэр иннилэригэр «Demo Day» диэн тэрээһиҥҥэ оҕолор бырайыактарын билиһиннэрдилэр, Торумнаммыт дьыала төһө барыыстаах буолуон сөбүн, бородууксуйа атыыга барар кыаҕын экспертэри кытта ырыттылар.
Бу күн иккис аҥаарыгар түмүктүүр үөрүүлээх тэрээһин буолла.
Номинацияларынан кыайыылаахтар ааттара билиннилэр:
«Бастыҥ менеджер» — Эрсан Винокуров («RePreSent» хамаанда)
«Бастыҥ маркетолог» — Богдан Фёдоров («UNIQUE» хамаанда)
«Бастыҥ дизайнер» — Никита Слепцов («UNIQUE» хамаанда)
«Бастыҥ разработчик» — Леонид Петров («Who-too-ton» хамаанда).
Бырайыактар араас сонун тиэмэлэрдээхтэрэ: Наука дьоҕус Академиятын саҥа сайтын оҥорорго III-c миэстэ, Веб үпкэ симуляторыгар II-c миэстэ, саҥа оскуолаҕа киирэн муммат гына сирдьити уонна оҕолорго оскуола туһунан информация биэриигэ I-кы миэстэ этилэр.
Кыайыылаахтар харчынан бириис ыллылар – туһааннааҕынан 100, 70, 50 тыһ. солкуобайы.
Тэрээһиҥҥэ кыттыбыт хамаандаларга Наука дьоҕус Академиятын ректора Василий Павлов, Дьокуускайдааҕы it-паарка дириэктэрэ Руслан Тыкушин, ХИФУ «ОРЕХ» Технологическай урбаан киинин салайааччыта Анисия Аммосова оҕолорго өссө да үгүс ситиһиилэри баҕардылар уонна стартап тэриннэхтэринэ it-пааркаҕа уонна «ОРЕХ» акселераторга резидент быһыытынан киирэргэ ыҥырдылар.
Николай БАРАМЫГИН.