Мин бүгүн кэпсиир киһим — Тиит Эбэ сэлиэнньэтин биир тутаах үлэһитэ, «Кэскил» оҕо саадын кэлэктиибин 18-с сылын салайар Юриянна Петровна Трофимова. Кини оскуоланы ситиһиилээхтик бүтэрэн баран 2-с №-дээх Дьокуускайдааҕы педагогическай училищеҕа туттарсан киирэн, идэ ылан биһиэхэ оҕо саадыгар үлэлии кэлэр. Эдэр, эрчимнээх, үлэтигэр ахсаабат кыһамньылаах, бэриниилээх, уйаҕас-сайаҕас санаалаах кыыһы сэбиэдиссэйинэн аныыллар.
Талбыт идэтинэн утумнаахтык үлэлээн, Юриянна Петровна билиитин хаҥатаары салгыы пединституту ситиһиилээхтик үөрэнэн бүтэрбитэ. Билигин эйэлээх-иллээх, үлэлииргэ, айарга-тутарга баҕалаах кэлэктиибин кытта үлэлэрэ күөстүү оргуйар. Салайааччы быһыытынан элбэх идеялээх, үлэтигэр бэриниилээх, ыарахаттан чаҕыйбакка саҥаттан саҥа сүүрээннэри кииллэрэр буолан кэлэктиибин махталын ылыан ылла.
Юриянна олоҕун аргыһа Анатолий Рехлясовтыын Эрсан диэн уол оҕолоохтор. Уоллара аҕатын батыһа сылдьан барыга бары үөрэнэр, үөрүүнэн көмөлөһөр туһа киһи. Кинилэр дьиэ кэргэнинэн бииргэ айылҕаҕа сылдьалларын, бултуулларын, сир астыылларын сөбүлүүллэр. Саха ыалын сиэринэн сүөһү ииттэллэр, сылгылаахтар, үлэлэрин бары бииргэ көмөлөөн толороллор. Нэһилиэкпит киэн туттар ыала Юриянна уонна Анатолий эдэр дьоҥҥо холобур буолаллар. Баҕарыам этэ кинилэргэ сиккиэр тыал алаһа дьиэлэрин супту үрбэтигэр, уостубат уйгулаах олоҕу!
Анастасия Мордовская, иитээччи, Тиит Эбэ с.