Уһук Илиҥҥи федеральнай уокурук көмөтүнэн
Төхтүр нэһилиэгин оҕо уһуйаанын биир уратыта — манна сэлиэнньэ оҕолоруттан ураты Өктөм кырачааннара эмиэ сылдьаллар. Быйыл күүтүүлээх-кэтэһиилээх саҥа уһуйаан дьиэтин тутуута саҕаламмыта уонна эһиил баччаҕа үлэҕэ киирэрэ былааннанар.
Бу күннэргэ нэһилиэккэ бу улахан тутуу бара турар дьиэ мэндиэмэнэ тахсан эрэрэ ыраахтан көһүннэ. Тутуу хаамыытын «Кэнчээри» оҕо саадын сэбиэдиссэйэ Анна Афанасьева кылгастык билиһиннэрдэ:
— Эргэ көтүрүллүбүт дьиэбит 1968 сыллаах тутуу этэ. Үлэһиттэр, иитиллээччилэр, төрөппүттэр уонна да бары олохтоохтор 90 миэстэлээх, икки этээстээх таас уһуйааммытыгар көһөрбүтүн олус диэн үөрэ күүтэбит. Саҥа дьиэбит СӨ инвестиционнай бырагырааматынан тутуллар. Генеральнай бэдэрээччик «АЭБ Капитал» тутуу хампаанньата, тутааччы «Восток Капитал». Билигин бастакы этээһэ бүтэн иккиһигэр сылдьаллар. Улахан тымныылар түһүөхтэригэр диэри тутааччылар үлэлиэхтээхтэр.
Уһуйаан 6 бөлөххө анаммыт хостордоох: аһыыр, утуйар, үөрэнэр, саҥа ирдэбиллэргэ эппиэттиир IT-технология хосторо, спорт уонна актовай саалалар барыта баар буолуохтаах. Нэһилиэктэн манна 60 оҕо сылдьыахтаах уонна 30 эбии миэстэни саппааска тутабыт. Кырачааннары балтараа саастарыттан ылабыт, ол иһин чугас сытар сэлиэнньэттэн биһиэхэ куруутун сылдьаллар. Уһуйааммытыгар оҕолор талааннара сайдыытыгар болҕомтобутун уурабыт: хомуска, саахымакка, дуобакка оонньуурга, робототехникаҕа үөрэтэбит.
Бу тутуу дойду президенэ Владимир Путин «Үрэҕэрии» национальнай бырайыак көмөтүнэн барар. Санатар буоллахха, билигин «Кэнчээри» оҕо саада А.Д. Широких аат. Төхтүр орто оскуолатыгар көһөн кырачааннары кытта үлэлиир.
Татьяна Владимирова.