Эркээни хочотун култууратын үлэһиттэрэ уонна актыбыыстара кыттыылаах Сомоҕолоһуу күнүгэр аналлаах улахан кэнсиэр Уулаах Ааҥҥа, Нөмүгүгэ, Өктөмҥө, Төхтүргэ буолла. Маннык бырайыагы Эркээни хочотун култууратын үлэһиттэрэ саҕалаабыттара ыраатта. Быйыл эмиэ күүстэрин холбоон улахан кэнсиэр бэлэмнээн, дьон сэҥээриитин ыллылар.
Кэнсиэри иилээн-саҕалаан ыытта Ольга Емельянова. Кини быйыл Уулаах Аан А.К. Анастатова аатынан “Айылгы” култуура киинигэр дириэктэринэн ананан үлэтин саҕалаата. Уулаах Аан көрөөччүлэрэ хас биирдии тахсыбыт кыттааччыны дохсун ытыс тыаһынан көрсөн үөртүлэр. Уулаах Аан баһылыгын солбуйааччыта Михаил Матвеев бэйэтинэн кыттан, ыллаан, үҥкүүлээн барыбытын сөхтөрдө. Дьэ маннык үлэһит атыттарга холобур буолуох тустаах. Култуура киинигэр быйыл саҥа талааннаах исписэлиис кэлбитэ тута харахха быраҕылынна. Бастакытынан эдэр киһи, иккиһинэн дэгиттэр талаанынан дьон сэҥээриитин ылыан ылла. Бу Ньурба улууһун чулуу ыччата Егор Макаров.
Нөмүгүгэ киэһэ 8 чааска аан таһыгар элбэх киһи кэтэһэн турарыттан, бары үөрэн түөспүт иһигэр итии салгын киирэргэ дылы буолла. Нөмүгү актыбыыс эдэр ыччаттара флешмоб үҥкүүлээн, кэнсиэрпитин ситэрэн-хоторон биэрдилэр. Үҥкүү салайааччытынан быйыл саҥа кэлбит исписэлиис, Муоматтан төрүттээх Василина Слепцова — Туналы эмиэ биир дэгиттэр талааннаах киһи эбит. Ол курдук, ырыаҕа, саха тылынан уус-уран айымньыларыгар, үҥкүү туруоруутугар ураты көрүүлэрдээх, элбэҕи эрэннэрэр биир идэлээхпитинэн өссө да киэн туттуохпут диэн эрэнэ кэтэһэбит. Нөмүгүгэ дириэктэринэн Мария Андреева үлэтин тэтимнээхтик саҕалаабыт.
Өктөмҥө дьон эрдэттэн билиэт атыылаһан, балачча элбэх киһи кэлбит. Буоларын курдук, өктөмнөр көхтөөхтөрүн көрдөрөн, хас ырыа аайы туран үҥкүүлээн бэйэлэрэ да астыннылар. Хас биирдии кыттааччыны күргүөм ытыс тыаһынан көрсөн, кыттааччылар сүргэлэрин көтөхтүлэр. Эдэр исписэлиисэр Руслан Игнатьев, Алексей Фомин эрчимнээх ырыалара дьон биһирэбилин ылыан ылла. Өктөмнөөҕү норуот тыйаатырын артыыстара (режиссер Зоя Аржакова) көрдөөх экцентриканы олус табыллан туруордулар. Тэтимнээх узбек омук үҥкүүтүн «Арылык» үҥкүү бөлөҕө чаҕылхайдык толорон, саала иһэ ытыс тыаһынан, хаһыынан туола түстэ. Эйэҕэс мичээрдээх Анна Алексеева ырыата эдэр сааһы санатан, барыбытын долгутта.
Төхтүргэ кыттааччыларбыт дьэ хоннохторо аһыллан, бары нүөмэрдэри олус табыллан толордулар. Көрөөччүлэр да ытыстарын тыаһа хабыллан олордо. Мааны куоластаах Дария Захарова ыллаан эйээрдэҕинэ дууһаҥ сырдыырга дылы буолар. Төхтүр нэһилиэгэ хомус куттаах буолан, култуура үлэһиттэрэ хомус тыаһатан, норуот ырыатын ыллаан кэнсиэри киэргэттилэр.
Маннык бары бииргэ буоллахха, сомоҕолостоххо – туох барыта табыллан, бары кыайыылаах буоларбыт саарбаҕа суох. Эркээни хочотун култууратын үлэһиттэригэр айымньылаах үлэни, элбэх көрөөччүлэри баҕара хаалабыт.
Федора Фомина.