Михаил Николаев төрөөбүт күнүгэр, сэтинньи 13-гэр, Өктөм нэһилиэгин Чапаев сэлиэнньэтигэр баар Николаев-кииҥҥэ «Доҕоттор көрсүһүүлэрэ» диэн общественность мунньаҕа буолан ааста. Манна Михаил Ефимович үлэтигэр биир санаалаахтара, чугас доҕотторо, судаарыстыбаннай уонна муниципальнай былаас уорганнарын, үөрэҕирии, наука, култуура уонна доруобуйа харыстабылын, спорт о.д.а. тэрилтэлэр бэрэстэбиитэллэрэ кытыннылар.
Николаев-киин дириэктэрэ Юрий Семенов көрсүһүүнү арыйарыгар Михаил Ефимович соратниктарын кытары норуотун үтүө үгэстэригэр, ис кыаҕар, айар интеллигенциятыгар, общественноска тирэнэн бар-дьонун көмөтүнэн өрөспүүбүлүкэбит кэскилин түстээбит сүдү өҥөтүн бэлиэтээн аһарда. Маны Российскай Федерация Бырабыыталыстыбата, сүрүн научнай уонна үөрэх кииннэрэ билинэллэрин, бүгүн Саха сирэ инники күөҥҥэ иһэрин эттэ уонна бу ситиһиилэри сүтэрбэккэ сайдыы суолунан инники диэки барарга ыҥырда.
СӨ Баһылыга Айсен Николаев мунньах кытыылаахтарыгар Бастакы президеммитигэр анаабыт үтүө тыллара этилиннилэр, махтанан, сүгүрүйэн туран ытык киһибит аатын үйэтитиигэ аналлаах Ыйааҕын экрантан билиһиннэрии буолла. Өктөм нэһилиэгин хуора «Махтал ырыатын» ыллаанньиргиттэ.
Улууспут баһылыга Олег Иринеев хаҥаластар ааттарыттан махтал тылларын эттэ уонна Михаил Ефимович саҕалаабыт дьыалата салҕааччылардаах буоларын эрэннэрдэ. Тыл эппит Михаил Николаев бииргэ алтыһан үлэлээбит доҕотторо, соратниктара, Климент Иванов, Люлия Григорьева, Будимир Слепцов, Альбина Поисеева о.д.а. Россия эрэ буолбакка аан дойду таһымнаах ытык киһибит ыллыктаах тылларын тириэртилэр, сүдү кыаҕын, инники өтө көрөр өркөн өйүн, хорсун быһаарыныыларын бэлиэтээн туран, сүгүрүйэллэрин, эдэр көлүөнэҕэ Михаил Ефимович дьоһун саҕалааһыннарын дьоһуннук салгыылларыгар эттилэр.
Оксана ХАРИТОНОВА, Николаев-киин М.Е.Николаев архыып-бибилэтиэкэтин үлэһитэ.