Хаҥалас общественноһа СӨ Бастакы президенэ, биир дойдулаахтарын төрөөбүт күнүн быйыл сир-сир аайы киэн туттан, кэриэстээн, махтанан ахтыы тэрээһиннэринэн бэлиэтээн аһардылар. Бу бэлиэ күнү көрсө Михиал Ефимович аатын үйэтитиигэ ыччатфорума, оскуолаларга аһаҕас уруоктар, кинисоратниктарын кытары көрсүһүүлэр, быыстапкалар, викториналар буоллулар.
Покровскайга улуус общественноһын мунньаҕа «Саргы түһүлгэтэ» култуура уонна сынньалаҥ киинигэр оҕолорбут Инновация уонна Михаил Николаев Айыы сирин көрбүт бэлиэ күнүн көрсө роботехникаҕа, илиинэн оҥоһуктарга, ракета моделларын оҥорууга киэҥ быыстапканы тэрийдилэр. Өктөмтөн уруһуйдьуттар түмсүүлэрэ, Покровскайдааҕы ойуулуур-дьүһүннүүр оскуола оҕолоро Михаил Николаевка аналлаах үлэлэрин билиһиннэрдилэр. Фото-суруналыыс Степан Саввин ытык киһибит кыттыылаах тэрээһиннэриттэн түөрт уонча сыл түһэрбит хаартыскаларын архыыбыттан быыстапката дьон болҕомтотун тарта. Улуустааҕы бибилэтиэкэ үлэһиттэрэ сонун бэчээтинэй бородууксуйаларын кэлбит дьоҥҥо утары ууннулар.
Общественность мунньаҕын Иван Яковлев аатынан Покровскай 1 №-дээх орто оскуолатын ахсыс кылааһын уолаттара дорҕоонноох хоһоон ааҕыыларынан арыйдылар. Михаил Николаев оҕо, эдэр сааһын дьүһүйэр үрдүк таһымнаах хореографическай туруоруунан махтанан Аксения уонна Наталия Посельскаялар ааттарынан өрөспүүбүлүкэтээҕи хореографическай училище үҥкүүһүт оҕолоро дьүһүйэн көрдөрүүлэрэ долгутта. Василий Босиковаатынан Музыка Үрдүкү оскуолатын оҕолоро тэрээһини киэргэттилэр. Сценаҕа улахан экраҥҥа Михаил Николаев норуотугар сулууспалаабыт дьоһун олоҕо сырдатыллан ааста.
— Быйыл хаҥаластар өр сылларга дурда-хахха буола сылдьыбыт ытык киһибитин сүтэрдибит, кини төрөөбүт күнүн тулаайахсыйан бэлиэтиибит, — диэн хомойон эттэ мунньаҕы арыйыыга улуус баһылыга Олег Иринеев уонна Михаил Ефимовичпыт аатын үрдүктүк тутан олоххо инники сылдьыахтаахпытын бэлиэтээн аһарда. Кини М.Е. Николаев былырыыҥҥы Орто Дойдуга ыытыллыбыт ыһыахха биир дойдулаахтарыгар хаҥаластар буоларбытынан киэн туттуохтаахпытын, наукаҕа тирэҕирэн үлэлээн-хамсаан, сомоҕолоһон дойдубут кэскилин туһугар үлэлиэхтээхпитин, айыах-тутуох кэриҥнээхпитин эппитин санатта уонна Михаил Николаевтыы олоруохтаахпытыгар ыҥырда. Истиҥ тыллары кэккэ сылларга кинини кытары бииргэ үлэлээн кэлбит биллэр-көстөр дьон Матвей Мучин, Александр Ким-Кимэн, Люлия Григорьева, Афанасий Владимиров о.д.а. эттилэр. Бастакы президеммит эдэрчи көмөлөһөөччүлэрэ Николай Барамыгин, Сергей Попов Айыы тыыннаах сүдү настаабынньыктарын туһунан ахтанбиһиги урут истэ илик түгэннэрбитин махтана кэпсээн аһардылар, кини ыра санаатын хаҥаластарга тириэртилэр. Олус истиҥ, курус тыыннаах тэрээһин буолла. Президеммитигэр анаммыт дьоро киэһэбит
«Россия бүттүүнүн олоҕун уһансан
Килбиэннээх киһибит Эн буоллуҥ!
Бу саҥа үйэҕэ, бу Орто дойдуга
Эн аатыҥ ааттана туруохтун!»
диэн тыллардаах «Махтал ырыатынан»
дьоһуннук түмүк-тэннэ.
Людмила АММОСОВА.