«Лети, звон бубенцов!» фестиваль ахсынньы 2 күнүгэр Дьокуускайга Өксөкүлээх Өлөксөй аатынан Норуоттар доҕордоһууларын дьиэтигэр бэрт тэрээһиннээхтик ыытылынна. Тэрээһини түмүктүүр гала-кэнсиэр Дьаамсыктар өрөгөй ырыаларынан арыллыыта мустубут дьону эриэккэс долгуҥҥа киллэрдэ. Быйылгы фестиваль «Потомки государевых ямщиков« тэрилтэни төрүттээбит общественнай-политическай деятель Анатолий Добрянцев сырдык аатынан салаллан барда. Бырааһынньык саҕаламмытынан мустубут самодеятельнай артыыстары Ил Түмэн дьокутаата Саха сирин норуоттарын Ассамблеятын салайааччыта Александр Подголов, Иркутскай уобалас Сокуону таһаарар уорганын бэрэссэдээтэлин солбуйааччы Кузьма Алдаров эҕэрдэлээтилэр.
Бастакынан култуура дыбарыаһын сыанатыгар ырыа кэһиилээх Киренскэй куораттан кэлбит ыалдьыттарбыт, «Оберег« народнай фольклорнай ансаамбыл ырыаһыттара Ольга Ковадло уонна Лена Казакова таҕыстылар. Ыалдьыттарбыт ырыаларын мустубут дьон ытыс тыаһынан көрүстүлэр. Онтон оҕолорбут, дьаамсыктарбыт хос-хос сиэннэрэ Наталья Лебедкина салайар Табаҕаттан «Озорницы« ансаамбыла үҥкүүлээн тэйдэ, Дьокуускайтан «Раздолинка» вокальнай ансаамбыл «Во кузнице» диэн ырыаны бэлэхтээн үөртэ. «Сидел Ваня на диване» нүөмэринэн Бэстээхтэн Кирилл Винокуров сэргэхситтэ. Матвей Савицкай, Александр Мигалкин «Вдоль по улице метелица метет« ырыаларын толорон көрөөччүлэр куттарын туттулар. Өрүү инники дьаам ырыатынан култууратын тута сылдьар «Ямские бубенцы» СӨ култууратын үтүөлээх үлэһитэ Ирина Стрекаловская салайар кэлэктиибэ дьаамсыктар ырыаларыгар попурри толорон астыннарда. Дьэ ол кэнниттэн фестиваль кыттыылаахтарын куонкурустаспыт үлэлэрин сыаналыыр жюри бу күннээҕи үлэтин түмүгүн иһитиннэрдэ, наҕараадалары туттарыы быыһыгар, биллэн турар, ырыа, үҥкүү, музыка салҕанна.
Дьэ кимнээх фестиваль кыайыылаахтарынан буоллуларый?
Араас анал ааттары кимнээх ыллыларый? Билиһиннэриим.
«Урукку дьаам суолун ырыалара» диэн номинация кыайыылаахтарынан биһиги үөдэйдэрбит «Вечорка«ансаамбыла буолла! Эчи үчүгэйин – үөдэйдэр этэ аан бастаан дьаамсыктар фольклордарын тарҕатан бу хамсааһыны саҕалаабыт дьон. Салгыы, биллэн турар, Сиинэттэн уопуттаах СӨ култууратын үтүөлээх үлэһитэ Лидия Яйлиян Дьокуускайга киирэн тэрийбит «Раздолье»кэлэктиибэ, өрүү көхтөөх, араас тэрээһиннэрбитин арыаллыыр, кырачаан оҕолорбутун нуучча култууратыгар уһуйары кыайа тутан эрэр Покровскайбыт «Ямщицкий перезовон» народнай ансаамбыла, Булгунньахтаахтан «Сударушка», ону сэргэ биирдиилээн, бөлөҕүнэн толоруулар хото дипломнарынан, анал ааттарынан бэлиэтэннилэр.
Дьокуускайтан, Иркутскай уобаластан
«Норуот инструменнарыгар оонньооччулар» анал ааттарыСиинэттэн Андрей Филиппов, Михаил Золотарев, Тойон Арыыттан Валерий Фарфоломеев ыллылар. Частушкаһыттарга Киренскэйтэн «оберегтар«, Дьокуускайтан «раздольелар« бастыахтарын бастаатылар. Мохсоҕоллоохтон «Бубенцы нал Леной» бэлиэтэннэ. «Былыргы хороводнай, оонньуулардаах ырыаларга» үөдэйдэр, покровскайдар, Дьокуускайтан «сударушкалар» тэҥнээхтэрин булбатылар. «Былыргы үҥкүүлэргэ» фестиваль дипломнарынан Дьокуускайтан «Теремок» оҕо уһуйаанын бөлөҕө, Табагаттан «Рябинушка» кэлэктиибэ бэлиэтэннилэр. Музыканнарбыт Николай Макаров, Михаил Золотарев, Валерий Варфоломеев, Андрей Филиппов, Климентий Филиппов наҕараадаланнылар... Ханна да буоларын курдук көрдөөх частушкаларынан Зинаида Добрянцева көрөөччүлэр куттарын тутта. Бу киэһээ саала ытыс тыаһынан хабыллан олордо. Кырдьык даҕаны, норуот бырааһынньыга буолла. Күн судаар дьаамсыктарын сыдьааннарын общественнай тэрилтэтин аатыттан салайааччы Ирина Стрекаловская, ону сэргэ ыраах сиртэн ыалдьыттарбыт, жюри чилиэннэрэ бары кыттааччыларга, дьаам култууратын саҥа көлүөнэҕэ тириэрдээччилэргэ махтал тылларын эттилэр… Ил Дархаммыт Айсен Николаев ыйааҕынан олохтоммут түөрт оройуоҥҥа биллэриллибит Дьаам култууратын 5 сылларын салгыы сөргүтүүгэ үлэҕэ, норуоттар иллээх-доҕордуу буолууларыгар баҕа санааларын тириэртилэр.
Людмила Аммосова.