Худуоһунньук Наум Засимов быыстапката  үлэлиир

Покровскайга «Саргы түһүлгэтэ» култуура киинигэр Хартыына галереятыгар «Верность творческому пути» диэн ССРС худуоһунньуктарын сойууһун  1975 сыллаахтан  чилиэнэ, Нөмүгүттэн төрүттээх биир дойдулаахпыт, худуоһунньук  Наум Засимов  быыстапката арыллан дьон болҕомтотун тарта.

Бу  В.И.Суриков аатынан Москватааҕы  государственнай художественнай институту 1956 сыллаахха бүтэрбит идэтийбит худуоһунньук Саха сиригэр үлэлээн-хамнаан, дьоһун айымньыларын айан  олорон ааспытын туоһута. Үс убайын   Аҕа дойду Улуу сэриитигэр 13 саастааҕар  атаарбыт  уолчаан сэрии иэдээнэ диэн тугун билэринэн хартыыналарыгар  сэрии, кыайыы тиэмэтэ үгүс.  Ол курдук быыстапкаҕа бэйэтин убайдарын, кыһыл хамандыыр Иван Строду, Саһыл Сыһыыга кыргыһыыны көрөбүт уонна,  биллэн турар, сэбиэскэй кэмнээҕи эйэлээх олоҕу,  баараҕай тутуулар кыттыылаахтарын, тыа сирин дьонун үйэтитэн хаалларбытын, Сахабыт сирин хатыламмат кэрэ айылҕатын. Быыстапканы Наум Матвеевич тапталлаах кэргэнэ Людмила Засимова тэрийдэ. Таарыччы эттэххэ, хантыынабыт галереята Н.М.Засимов аатын сүгэр.

Түгэни мүлчү тутумаҥ, быыстапканы оҕолоргутун кытары  кэлэн көрүҥ!

Людмила Аммосова.