Хаҥалас улууһун оҕолоро бу күрэхтэһиилэргэ кыттарга бэлэмнэнэн дьарыктаналлар. Ол курдук биирдиилээн үөрэх кыһаларыттан оонньууларга дураһыйар спортсменнар да бааллар. Покровскай 4 №-дээх оскуолатын дириэктэрэ Надежда Козлова кэпсиир:
— «Азия оҕолоро» оонньууларга кыттар чиэс мээнэҕэ кэлбэт. Спортсменнарбыт бу күрэхтэһиилэргэ хамаандаларга киирэллэр. Биһиги оскуолаттан Полина Пшенникова кандидат буолар кыахтаах. Кини сүүмэрдиир күрэхтэргэ кытынна. 200 м. сүүрүүгэ үһүс, 400 м. – иккис, Дьокуускайга эстафетаҕа иккистээбитэ. Полина тренерэ Барлукова Татьяна Владимировна. Кыыс иккис спортивнай разрядтаах. Биһиги Сахабыт сирин чэпчэки атлетикаҕа Хабаровскайга ыытыллыбыт күрэхтэһиилэргэ 200 м. сүүрүүгэ бэһис, 60 м. сэттис буолан кэлтэ. Сэттис кылааска да үөрэннэр улуус хас да төгүллээх чемпиона, өрөспүүбүлүкэҕэ 200 м. бастаан турар, 60 м. уһуҥҥа үрүҥ көмүс мэтээллэммитэ. Бу бэрт ситиһии, — диэтэ салайааччы.
Ити курдук, ааспыт Оонньууларга тыа да сириттэн оҕолор үрдүк пьедесталга турбуттара дии. Холобур, Лена Мутовина Сиинэттэн бастаабыта сөхтөрбүтэ. Спорпут миниистирэ Леонид Спиридонов бастакы оонньууларга ситиһиилэнэн Олимпийскай оонньууларга бастыҥнар кэккэлэригэр тахсыбыта баара…
Людмила Аммосова.