Спорду, чуолаан, волейболу өрө туппут, дьону түмпүт Александра Семеновна Васильева сырдык кэриэһигэр ыытыллыбыт волейболга өрөспүүбүлүкэ таһымнаах турнирга, Эргэ Саҥа дьылы көрсө, түүн 3:30 дылы тура тэбинэн туран, кэрэ аҥаардар сындалыйбакка, сылайбакка оонньоотулар.
Хас биирдии хамаандалар оонньооччулара, спортивнай майгыларынан, дьүккүөрдэринэн сытыы бысыһыылардаах, күүстээх охсуулардаах, быһа биэриилэрдээх, бэрт үчүгэй комбинациялардаах оонньуулары көрдөрдүлэр.
«А» бөлөххө көрсүбүт хамаандаларын 2:0 эрэллээхтик кыайталаан, Мэҥэ Хаҥаластан «Мэҥэ» хамаандата бастаата. 2-с миэстэни Дьокуускай куораттан «Саха Бэчээт» хамаандата ылла. 3 миэстэҕэ Хаҥаластааҕы бэтэрээннэр хамаандалара буолла.
«Б» бөлөххө «Хаҥалас» хамаандата бастаата. 2-с Дьокуускай куораттан «Виктория» уонна 3-с бочуоттаах миэстэҕэ Уус Алдан күүстээх оонньооччулара тигистилэр.
Уопсай түмүгүнэн +45 саастаахтарга «Саха Бэчээт» волейбольнай кулууп бастаата, 2-с миэстэ мэҥэ-хаҥаластар, 3-с миэстэҕэ Хаҥалас бэтэрээннэрин хамаандата тигистэ.
+35-кэ — Мэҥэ-Хаҥалас хамаандата кыайыылаах, 2-с «Олимп» кулууп уонна бочуоттаах 3-с Дьокуускайдааҕы научнай киин хамаандата буоллулар.
Турнир бастыҥ оонньооччуларынан Дьокуускай куораттан, «Виктория» хамаандаттан Мария Васильева, «Саха Бэчээт» хамаандаттан Майя Бережнова, Уус Алдан хамаандатыттан Светлана Иванова уонна Лариса Жиркова ааттаннылар.
Александра Семеновна чугас дьонноро, аймахтара күрэхтэһиини долгуйа көрдүлэр. Тэрийээччилэргэ, чуолаан, Сарыалла Айылгылаахха, Айталина Потаповаҕа, Варвара Соломоноваҕа — Александра биир хамаандаҕа оонньообут дьүөгэлэригэр, бары кыттыбыт волейболисткаларга уонна бииргэ үөрэммит оҕолоругар, бирииһинэн көмөлөспүт дьоҥҥо ис сүрэхтэриттэн махтал истиҥ тылларын эттилэр. Тэрийээччилэр Олег Иванов дириэктэрдээх Спорт дыбарыаһын бары үлэһиттэрин, судьуйалары бэриниилээх үлэлэрин үрдүктүк сыаналаатылар.
Турнир сыллата буола турарыгар, Александра Васильева аата умнуллубатыгар баҕара хааллылар.
Уйбаан Уйгуурап.