«Үлэ дьоно» айар күрэх түмүктэннэ

Кыайыылаахтарынан Зинаида Лазарева, Виолетта Засимова ааттаннылар

Үлэ сылынан «Үлэ дьоно» айар күрэх Балаһыанньата ыам ыйыгар хаһыакка, сайтка, телеграм ханаалыгар бэчээттэнэн турар. Сыала-соруга диэн үлэ дьонун, саҥа уопуту, сыһыаннары сырдатыы, тыыппалаахтык суруйар ааптардары таба тайаныы этэ. Тэрийэн таһарааччыларынан редакция кэлэктиибэ, улуустааҕы суруналыыстар бастакы сүһүөх тэрилтэлэрэ буолта.

Суруйуулары ырытан сыаналыыр бөлөххө хаһыат суруналыыстара Людмила Аммосова, Валентина Хайритдинова, Хаҥаластааҕы суруналыыстар тэрилтэлэрин сэкиритээрэ Ольга Гермогенова, суруйааччы Татьяна Петрова-Мойуу Кыыһа киирбитэ.


Түмүгү таһаарыы
уустук соҕус буолла. Биһиги кэлбит суруйуу тиэмэтигэр төһө хоруйдуурун, тыла-өһө баайын, сырдатыы ньыматын болҕомтоҕо ыллыбыт. 11 ааптар кытынна. Ол иһигэр хастыы даҕаны суруйууну ыыппыттар бааллар, холобур, Сардаана Кириллина, Василий Можуков о.д.а. Сүнньүнэн ааптардар бэйэлэрин билэр дьоннорун, бэтэрээннэрин туһунан суруйдулар, үбүлүөйдэринэн эҥин сибээстээн. Тэрилтэ, кэлэктиип үлэтигэр, үлэтин уопутугар сыһыаннаах суоҕун кэриэтэ. Арай «Урааҥхайдар» спортивнай хамаанда туһунан суруйууну бэлиэтиэ этибит. Күрэхпитигэр кыттыбыт бары ааптарбытыгар махталбытын тириэрдэбит, үлэни, үлэ дьонун уруйдаабыккытыгар, ааҕааччыларбытыгар тириэрдибиккитигэр.


Онон
түмүкккэ сахалыы тыллаах “Хаҥалас” хаһыакка Кыһыл Үрүйэттэн үлэ бэтэрээнэ Зинаида Лазареваны, нууччалыы тыллаахпытыгар телесуруналыыс Виолетта Засимованы (видео-түһэриилэрдээх) кыайыылаахтарынан ааттаатыбыт. Анал бириистэринэн Төхтүртэн Мотрена Ефремова, Хоточчуттан Лира Яндреева бэлиэтэнэллэр. Күрэххэ кыттыбыт дьоммут бары даҕаны редакция үлэтигэр көхтөөхтөр, суруйууларынан өрүү үөрдэллэр. Инникитин даҕаны араас хайысхалаах куонкурустары ыытыахпыт. Биһиги хаһыаттарбытын ааҕыҥ, суруйуҥ, санааҕытын үллэстиҥ.

Людмила МОРДОВСКАЯ.