Айталина Васильева: «Дьон туһугар үлэ барыахтаах, кинилэр эрэллэрин толоруохтаахпыт»

Москваҕа, муниципальнай тэриллиилэр үлэһиттэрин форумугар

Москваҕа дойду президенэ  Владимир Путин  көҕүлээһининэн Бүтүн россиятааҕы «Төрүт дойду — Россия күүһэ» диэн муниципальнай тэриллиилэр бастакы форумнарыгар Хаҥаластан улуус баһылыга Олег Иринеев салалтатынан сэттэ нэһилиэктэр  салайааччылара кыттан кэллилэр. Тэрээһиҥҥэ Тиит Арыытан олохтоох дьаһалта баһылыга  Григорий Лукин «Служение» муниципальнай үлэһиттэргэ бириэмийэни туттарыыга «Судьба человека — гордость Отечества»  анал аат лауреата буолла. Бүгүн биһиэхэ 1-Малдьаҕар нэһилиэгин баһылыга Айталина Васильева форумтан санаатын үллэстэр:

— Форумҥа Россия араас регионнарыттан 7,5 тыһыынчаттан тахса муниципальнай үлэһиттэр кытыннылар, ол иһигэр Саха сириттэн 155 киһи. Хаҥаластан олохтоох дьаһалта баһылыга Григорий Лукин анал аат лауреатынан буолбутугтан  олус үөрдүбүт. Дойду президенэ Владимир Путин тыл этиитин иһиттибит, муниципальнай таһымҥа бэйэни салайынан олоруу   улахан суолталааҕын тоһолоон бэлиэтээбититтэн астынныбыт. Тэрээһин чэрчитинэн олохтоох бэйэни салайыныы үлэтигэр үөрүйэхтэри үллэстэр, үлэни сөптөөхтүк  тэрийиини ырытыһар төгүрүк остуолларга  саҥаа атастастыбыт, элбэх саҥаны билэнкэллибит.  Владимир Владимирович нэһилиэнньэ олоҕо тупсарыгар, күннэтэ тахсар  кыһалҕалары  быһаарыыга миэстэтигэр быһаччы дьону кытары үлэлиир муниципальнай  уорган  улахан оруоллааҕын бэлиэтээтэ. Бу норуоттарбытын  сомоҕолуур, саҥа соруктары ылынарга тирэх буолар тэрээһин буолла дии саныыбын.

ВДНХ павильоннарыгар тэриллибит төгүрүк остуолларга, бырайыактары билиһиннэриигэ көхтөөхтүк кытынныбыт, быыстапкалары көрдүбүт. Мин 50-тан тахса сектордартан үскэ сырыттым, дьон хайдах-туох үлэлии олороллорун билистим уонна биһиги даҕаны куһаҕана суох эбиппит диэн санааҕа кэллим. Дьон туһугар үлэлиир, улахан салайааччылар олоххо көрүүлэрин билсэр үчүгэй. Мин туризм хайысхатыгар санаабын үллэһинним. Сөбүлэһиилэри түһэрсэн кытары үлэлиэххэ сөп эбит. Атын дьон опыттарын көрөр үчүгэй. Иркутскайдар «Умный город» диэҥҥэ кытталларын сэргээтим. Владимир Путин  олорор сир, куорат эйгэтигэр  бырайыак 2030 сылга диэри салгыы барарын эппитин астынным. «Култуура» национальнай бырайыакка култуура эбийиэктэрин тутууга  санаабын эттим. Ыччаты патриотическай, дойдубут үтүө үгэстэригэр  иитиигэ  былаһааккаҕа сырыттым… Дьоҥҥо аһаҕас муниципальнай үлэһиттэр сайтарыгар  киирэр буоллубут. Госдуума дьокутааттарын кытары көрсүстүбүт, сокуону таһаарыыга, ыт, сылгы,  о.д.а.боппуруостарга этии киллэрдибит, хоруй биэриэх буоллулар.

Киин регионнарга муниципальнай уокуруктарга салайааччылар ананыллан үлэлииллэрэ кинилэргэ көҥүл дьаһаныыны ситэ биэрбэт эбит, сорох сирдэргэ олус элбэх бытархай, аҕыйахтыы ыаллаах  учаастактардаах   тэриллиилэргэ (биир баһылыгы кытары кэпсэтиибэр  кини 145  маннык түөлбэлэрдээх эбит, сорохторугар сылдьа да илигин кэпсээтэ) дьону түмэр, барыларын кыһалҕаларынбилсэ турар уустуктааҕын кэпсээтилэр. Уопсайынан, муниципальнай тэриллии үлэһитэ нэһилиэнньэ тугунан тыынан олорорун билиэхтээх, дьоҥҥо чугас буолуохтаах. Бириэмийэбит да аата «Служение» диэн ону этэр — дьон туһугар үлэ барыахтаах, кинилэр эрэллэрин толоруохтаахпыт. Биллэн турар, дьон олоҕо сайдыытыгар бэйэтэ эмиэ  көхтөөх буолуохтаах.


Онон мин бэйэм нэһилиэкпэр түөлбэлэринэн үлэҕэ улахан болҕомтону уурар санаалаахпын, дьо
н бастатан туран  туохха наадыйарын бэйэтэ ордук билэр, онно кыһаллыахтаах, онтон биһиги көмөлөһүөхтээхпит. Үп-харчы  тыырыытыгар  нэһилиэнньэ эмиэ  кыттыахтаах. Уонна иһитиннэрии-биллэрии, дьоҥҥо быһааран биэрии олохтонуохтаах, ол биһиэхэ ситэ кыалла илик.Олохтоох бэйэни салайыныы уорганнарыгар болҕомто ууруллубута, маннык форум буолбута  олус үчүгэй, бу уустук кэмҥэ дьону сомоҕолуур. Дойдубут, дьоммут туһугар үлэлиирбит ирдэнэр, — диэтэ  улууспут нэһилиэктэрин биир үчүгэй үлэлээх дьаһалтатын баһылыга. Ситиһиилэри баҕарыаҕыҥ!

Людмила Аммосова.