Шагдар Гансух: «Эппиэтинэс улахан, дьарыктар салҕаналлар»

«Азия оҕолоро» оонньуулары көрсө

— Түөрт оҕом дзюдо көрүҥэр спортивнай оонньуулар сүүмэрдэммит хамаандатыгар киирдилэр”, — диэтэ Илиҥҥи бойобуой искусство көрүҥэр оҕолору дьарыктыы сылдьар Дьокуускайдааҕы олимпийскай эрэллэргэ оскуола Покровскайдааҕы салаатын тириэнньэрэ Гансух Шагдар, – Бу Покровскайтан 3 №-дээх оскуолаттан Иван Попов, 1 №-дээхтэн Стас Сулейманов, уонна Мохсоҕоллоохтон Антон Шадрин, Юлия Донская.    

— Оҕолор республикаҕа бастыыр иһин күрэхтэһиилэр кыайыылаахтара. Антон өссө Уһук Илин күрэҕэр үһүс бириистээх миэстэлэммитэ. Бары 2010 сыллаахха күн сирин көрбүт оҕолор. Хомуурдарга хаста да кытыннылар, мин дойдубар Монголияҕа баран күрэхтэһэ сылдьыбыттара. Нэдиэлэҕэ хастыы да чаас дьарыктанабыт, эппиэтинэһи өйдүүбүт – Оонньуулары төрүттээбит Сахабыт сирин чиэһин көмүскүөхпүт турар. Бэлэмнээх буоларбыт ирдэнэр, — диэтэ кини уонна Иркутскайга хомуурдарга сылдьан түспүт хаартыскаларын ыытта. Билсиҥ, баҕар бу спортсменнартан кэлин олимпийскай чемпионнар тахсыахтара. Ситиһиилээх эрчиллииллэри баҕарыаҕыҥ!

Онтон тренердэрэ Шагдар Гансух Монголия сүүмэрдэммит хамаандатын эрчийбит, бэйэтэ аан дойдутааҕы 3-с даннаах курун хаһаайына, Монголия «Хотугу сулус» уордьанын кавалера, дойдутун олимпийскай мэтээлинэн бэлиэтэммит, «Азия оҕолоро» оонньууларга эппиэтинэстээх тириэньэринэн хаста даҕаны үлэлээн кэлбит дьоһун киһи.

Людмила МОРДОВСКАЯ.