Үөдэй орто оскуолата 60 миэстэлээх саҥа таас дьиэтэ аанын аста.
Билии кыһата дойду президенэ Владимир Путин көҕүлээбит «Үөрэҕирии» национальнай бырайыак чэрчитинэн, «Тыа сирин кэлимник сайыннарыы» судаарыстыбаннай бырагырааманан тутулунна. Уопсайа 1395,0 кв. м иэннээх, толору хааччыллыылаах дьиэҕэ лабораториялаах физика, химия, иистэнэр массыыналардаах, туттар тэриллэрдээх технология кабинеттара, бибилэтиэкэ, киэҥ-куоҥ спортивнай саала, остолобуой баар, аныгы технологиялары туһанан оҕолору үөрэтэргэ бары усулуобуйа олохтоммут.
Бэлиэ түгэҥҥэ СӨ Ил Дархана Айсен Николаев, Үөрэх уонна билим миниистирэ Нюргуна Соколова, Ил Түмэн дьокутаата Афанасий Владимиров, Хаҥалас улууһун баһылыга Олег Иринеев кытыннылар.
Оскуола дириэктэрэ Прокопий Самсонов салайааччыларга саҥа оскуола ис тутулун, кабинеттары көрдөрдө, үөрэнээччилэри, учууталлары кытта билиһиннэрдэ. Үөрэнээччилэр Ил Дарханы кытта илии тутуһан, бэйэлэрин айымньыларын билиһиннэрэр буклет, дойдуларын сир аһыттан минньигэс барыанньа бэлэх уунан, истиҥник кэпсэтэн олуһун диэн астыннылар.
Айсен Николаев эҕэрдэ тылыгар дойдуга Дьиэ кэргэн, өрөспүүбүлүкэбитигэр Оҕо аймах сылын көрсө бу маҥнайгынан Хаҥалас улууһун Үөдэйигэр өр сылларга күүтүллүбүт таас оскуоланы арыйабыт диэн бэлиэтээн эттэ. «Биһиги өрөспүүбүлүкэбитигэр Бастакы президенэ Михаил Николаев саҕаттан үөрэх-билии сайдыытыгар, үөрэх хаачыстыбата үрдүүрүгэр улахан суолта ууруллар. Чуолаантыа сиригэр оскуола — олох эргийэр киинэ буолар, кини сайдыытыттан нэһилиэк бүтүн инникитэ тутулуктаах. Ононбу саҥа, аныгы тутуулаах оскуола үөрэнээччилэрэ, педагогтара ситиһии эйгэтин түстүөхтэрэ диэн эрэнэбин!», — диэн Айсен Сергеевич эттэ.
Бу күн оҕону иитиигэ бэриниилээх үлэтин иһин СӨ Баһылыгын Махтал суругунан Үөдэй орто оскуолатын музыка учуутала уонна уһуйаан музыкальнай салайааччыта Аурика Лугинова бэлиэтэннэ, өрөспүүбүлүкэ социальнай-экономическай сайдыытыгар кылаатын иһин оскуола дириэктэрин иитэр-үөрэтэр үлэҕэ солбуйааччыта Ольга Кельцинова СӨ Бырабыыталыстыбатын грамотатынан наҕараадаланна.
Хаҥалас улууһун баһылыга Олег Иринеев оскуола коллективын, нэһилиэк олохтоохторун баараҕай тутуу үлэҕэ киирбитинэн эҕэрдэлээтэ уонна Үөдэй төһө да улуус биируһук сэлиэнньэтэ буоллар, манна оҕо уһуйаана, спорт-култуура киинэ баар, аны таас оскуола баар буолла диэтэ, нэһилиэк 100% киин сылааска холбонон олорорун, уунан хааччыллыы баарын бэлиэтээн эттэ.
Билиҥҥи туругунан Үөдэй орто оскуолатыгар 53 оҕо үөрэнэр. Оскуола үөрэнээччилэрэ сылын аайы муниципальнай олимпиадаларга, «Инникигэ хардыы» өрөспүүбүлүкэтээҕи научнай-практическай конференцияҕа уо.д. а. улуус, өрөспүүбүлүкэ таһымнаах күрэхтэргэ ситиһиилээхтик кытталлар. Оскуола култуурунай-эстетическэй хайысханан ситиһиилээхтик үлэлиирин бэлиэтиир эмиэ тоҕоостоох: «Таммахтар» үҥкүү-ырыа ансаамбылын, муода театрын, изостудия иитиллээччилэрэ араас куонкурустар уонна бэстибээллэр лауреаттарынан уонна дипломаннарынан буолаллар.
— Үөдэйдэр билии кыһата саҥа дьиэлэнэрин өр сыл күүттүбүт. Ааспыт үйэ 80-с сылларыгар норуот күүһүнэн тутуллубут оскуола эргэрэн, үлэлиир-үөрэнэр усулуобуйабыт суох буолан, хаарбах туруктанан сабыллыбытын кэннэ үс сиринэн көһө сылдьан үлэлээбиппит, — диэн кэпсээтэ дириэктэр Прокопий Самсонов. — Ыра оҥостубут оскуолабыт дьиэтин «Веста» ХЭТ тутта. Кыракый Үөдэйбитигэр маннык сырдык, сылаас таас дьиэлэммиппит иһин Ил Дархаммытыгар Айсен Николаевка, өрөспүүбүлүкэ бырабыыталыстыбатыгар, улууспут баһылыгар Олег Иринеевка тус бэйэм, оҕолор, коллективым уонна нэһилиэк бары олохтоохторун аатыттан барҕа махталбын тиэрдэбин. Кэнчээри ыччаппыт билиилэринэн-ситиһиилэринэн дойдуларын ааттата туруохтара диэн эрэнэбин, — диэн дириэктэр махталын тиэртэ.
Бу күн өрөспүүбүлүкэ, улуус социальнай-экономическай сайдыытыгар, саҥа оскуола тутуллуутугар кылааттарын киллэрсибит дьоҥҥо наҕараадалар туттарылыннылар.
Үөрүүлээх тэрээһиҥҥэ бэтэрээн учууталлар, ыраахтан-чугастан араас сылларга үлэлээбит педагогтар, выпускниктар, ыҥырыылаах ыалдьыттар кэлэннэр үөдэйдэр үөрүүлэрин үллэһиннилэр, бэйэлэрин эҕэрдэлэрин анаатылар, бэлэх-туһах туттардылар. Тэрээһини үөрэнээччилэр, учууталлар бииртэн биир чаҕылхай ырыаларынан, үҥкүүлэринэн киэргэттилэр.
Ольга Гермогенова.