«САДУОБАБИЛ» түөлбэлэри түмтэ

Төхтүргэ үгэскэ кубулуйбут түөлбэлэр икки ардыларыгар ыытыллар «САДУОБАБИЛ» өй уонна спорт оонньуута “Эркээни” култуура киинигэр ыытылынна.

Нэһилиэкпит биэс түөлбэтиттэн хамаандалар саахымакка, дуобакка, баарыска уонна бильярдка күрэхтэстилэр, сүрдээх үчүгэй оонньуу түмүгүн көрдөрдүлэр. Дьүүллүүр сүбэ быһаарыытынан дуобакка “Мырсыкы” бастаата, 2 миэстэ “Үрдэл” буолла, 3 миэстэ — “Айтал”; саахымакка 1 миэстэ “Үрдэл”, иккис “Дьулуур” уонна үһүс “Сайдыы” түөлбэ буоллулар; баарыска “Үрдэл” кыайыылаах, 2 миэстэ “Мырсыкы”, 3 миэстэ “Сайдыы” тигистэ; бильярдка — “Айтал” бастаата, иккис — “Дьулуур” уонна 3 миэстэ “Сайдыы» түөлбэ буоллулар.
Түмүккэ 8 очколаах «Үрдэл», 12-лии очколаах «Мырсыкы» уонна «Дьулуур» түөлбэлэрэ, 14 очколаах «Айтал» уонна “Сайдыы” түөлбэлэрэ тэҥнэһэн таҕыстылар.

Бу күрэх нэһилиэк уопсай спартакиадатыгар киирэр, онон салгыы түөлбэлэр спорт араас көрүҥэр илин-кэлин түсүһүөхтэрэ.
Өссө биир үөрүүлээх сонун — нэһилиэкпит спордун бэтэрээнэ Дмитрий Березкин Дьокуускай куоракка ыытыллыбыт “Көмүс мас” өрөспүүбүлүкэтээҕи аһаҕас чемпионатыгар 65 киилэҕэ бастакы миэстэни ылары ситистэ. Кыайыы кынаттаах мадьыныбытын, киэн туттар уолбутун бастыҥ ситиһиитинэн истиҥник эҕэрдэлиибит, инникитин үрдүк дабайыылары баҕарабыт!

Дария Петрова.