“Хаҥалас Хапсаҕайа” дуо? – дэттэрбит турнир биир улуус ыырыттан төлө көтөн тахсан, быйыл киин куорат “Триумф” спорт сүрүн уораҕайыгар олунньу 3-4 күннэригэр Бастакы Россиятааҕы Гран-при турнирын титулун ылан, олус үрдүк таһымнаахтык ааста.
Ааспыт өрөбүллэргэ саха дьоно-сэргэтэ хапсаҕайынан олордулар диэтэххэ омун буолбата буолуо. Сүрүн көрдөрөр-иһитиннэрэр хампаанньа, куйаар ситимэ хапсаҕай сонунунан толору туолан, ааҕааччылар турнир хайдах ааспытын бэрткэ билэр буолуохтааххыт. Турнирга Монголия, Кыргызстан, Таджикистан, Узбекистан, Татарстан, Бурятия, Тыва, Алтай, Хакасия күүстээх спортсменнара кэлэн, күрэхтэһиини киэргэттилэр. Ону таһынан биһиги бэйэбит ааттаах-суоллаах бөҕөстөрбүт кытыннылар. Уопсайа 478 спортсмен, 35 хамаанда, 4 дойду, Россияттан 5 регион, өрөспүүбүлүкэ 26 улууһа кыттыыны ылбыттара турнир үрдүк таһымын кэрэһилиир.
Бастакы күҥҥэ ыйааһыннарынан хапсыһыылар кэннилэриттэн, Аан Дархан аатын ылар иһин абсолютнай күрэх ыытылынна. Ыарахан ыйааһыҥҥа Балдан Цыжипов итэҕэтиилээхтик кыайталаан бастаата, ол иһигэр биһиги күүстээх бөҕөстөрбүтүн Никита Хабаровы, Эдуард Максимовы, финалга Александр Халыевы. Кини сүрүн бириистэри – бриллианнаах мэтээли, чемпион курун, саха маастара оҥорбут батыйатын, 300 тыһ. солк. суумалаах сертификаты – дойдутугар Бурятияҕа илдьэ барда.
Иккис күнүгэр 75 киилэҕэ диэри 68 киһи абсолютнай күрэххэ суруттарбытыттан, Үөһээ Бүлүү бөҕөһө Тимур Николаев утарсааччыларын барыларын кыайталаан, бүтэһик хапсыһыытыгар Бурятия бөҕөһүн Сангади Ульзетуевы кэтэҕиттэн умса садьыйан охторон, чаҕылхай кыайыыны ситистэ. Кини саха дьонугар улахан үөрүүнү бэлэхтээн, “Хаҥалас хапсаҕайын” 2024 с. турнирын Аан Дарханын аатын ылла.
Бастакы Россиятааҕы “Хаҥалас хапсаҕайа” Гран-при олус үрдүк таһымнаахтык тэриллэн ыытыллыбытын кыттааччылар, тренердэр, ыалдьыттар уонна көрөөччүлэр тоһоҕолоон бэлиэтээтилэр. Хапсаҕай бу курдук Россияҕа биһирэнэн, салгыы аан дойду таһымыгар тахсарын кэтэһэбит.
Айталина ШАДРИНА.