Бу туһунан редакцияҕа модельнай библиотека сэбиэдиссэйэ Светлана Архипова сонунун үллэһиннэ.
— Тэрээһин дьаһалта дьиэтигэр буолла. Россияҕа биллэриллибит Дьиэ кэргэн, Саха сиригэр Оҕо саас сылларын чэрчитинэн «Саныыбыт, махтанабыт, сүгүрүйэбит» диэн герой-ийэ, туруу үлэһит, Хаҥалас улууһун Хачыкаат нэһилиэгин бочуоттаах олохтооҕо Ульяна Гаврильевна Гурьева туһунан кинигэни кыргыттара Наталья Афанасьева, Дария Гуляева кыһамньылаахтык ылсанбэлэмнээн таһаардылар, — диэн кэпсээтэ кини,- Ульяна Гурьева кэргэнинээн Семен Егоровичтыын 43 сыл бииргэ олорон уон оҕону төрөтөн көрөн-истэн улаатыннаран олох суолугар үктэннэрбиттэр, элбэх сиэни, хос сиэни билэр дьолломмуттар. Ульяна оскуола кэнниттэн Дьокуускайдааҕы биэлсэр-акушер үөрэҕэр үөрэнэн иһэн сэрии буолан Покровскайга үлэлии тахсарга күһэллибит.
Кини 1942 сыллаахха комсомол райкомун ыҥырыытынан эдэр ыччаты кытары үлэ фронугар мобилизацияҕахабыллан байыаннай суолталаах Хачыкаат — Томмот суолун тутуугар 1945 сыллаахха диэри күүстээх үлэҕэ сылдьыбыт. Кэлин Ленин уордьаннаах Данил Киприянов салайбыт колхоһугар суоччутунан, кассирынан, оҕо саадыгар иитээччинэн, метеостанцияҕа күнү-дьылы кэтээн көрөөччүнэн үлэлээн пенсияҕа тахсыбыт. Ити курдук төрөөбүт нэһилиэгиттэн тэйбэккэ олорон, үлэлээн дьонун-сэргэтин ытыктабылын ылбытын туһунан бу кинигэҕэ истиҥник ахтыллар. Кинигэ ааҕааччы киэҥ араҥатыгар ананар. Маннык дьоммут эдэр ыччакка үтүө холобур буолаллар, — диэн эбэн эттэ Светлана Васильевна уонна үөрүүлээх күнтэн хаартыскалары ыытта.
Людмила Мордовская.