Улууспутугар биир кэрэ-бэлиэ күн сатыылаан ааспытын аахайбакка хаалбыппыт. Нөмүгү нэһилиэгин киинигэр Ойго тустуу саалата тутуллан үлэҕэ киирдэ. Дьэ, дьиҥ-чахчылаах, норуот туппут-үбүлээбит тутуута эбит.
Кыахтаах дьоннор, нөмүгүлэр, 2018 с. «Проект — наслег» диэн өрөспүүбүлүкэтээҕи хапсаҕай күрэҕэр бастааннар УАЗ массыынанан биһирэммиттэрэ уонна биир санаанан массыыналарын күөҥҥэ уган, нэһилиэктэригэр тустуу дьиэтин тутан барбыттара. Киэҥ иһит салааһыннаах буоларыныы, улахан, киэҥ нэһилиэк дьоно-сэргэтэ үгүөрүтүк үбүлээбиттэрэ, көмөлөспүттэрэ.
Иккис үөрүүлээх түгэн, тустуу саалатыгар ССРС спордун маастара С.И. Заморщиков аатын иҥэрэн Степан Ильиһы ытыктыылларын олохтоохтук, дьоһуннаахтык биллэрдилэр. Степан Заморщиков Саха сиригэр көҥүл тустуу муҥутуурдук сайдан турдаҕына, Орджоникидзе оройуонуттан соҕотоҕун, силлиэлээх-холлоруктаах, түһүүлээх-тахсыылаах албан ааттаах хаҕыс сыллар-хонуктар мүччүккэй арҕастарынан харса суох, оройуонун аатын түһэн биэрбэттии хардыылаталаан сылдьыбытын чопчу билэбин.
Улуу тириэнньэр Дмитрий Коркин биир тарбахха баттыыр кэскиллээх бөҕөһө этэ, биһиги Степан Заморщиковпут. Аны туран, Степан Ильич үтүө-мааны майгылаах буолан, табаарыстара, доҕотторо тиһигин быспакка кэлэллэрэ-бараллара. Кэччэгэй-көҥөс киһиэхэ дьон аараабат, сылдьыбат үгэстээх. Степа баары баарынан, суоҕу суоҕунан олус аһаҕас, дэлэй киһи этэ. Аатырбыт бөҕөс Захар Чукров Степанныын өлөр доҕордуулар этэ. Захар киирэрэ киирдэҕинэ, кыыһырдаҕына Степан Ильич «Захар, тохтоо эрэ, ыл» диэн буойарын оҕолуу истэрэ, ылынара.
Tириэнньэр аатын сүгэр тустуу саалатыгар, Саха өрөспүүбүлүкэтин физкультураҕа уонна спортка үтүөлээх үлэһитэ Гаврил Дмитриев Владимир Романовтыын оҕолору уонна улахан дьону эрчийэллэр. Түбүктээх үлэлэрэ түмүктээх буолуталыыр эбит. Ону сахалыы сэмэй буолуу сиэрин тутуһан, улаханнык саҥарыллыбат. Кэмэ кэрдиитэ кэллэҕинэ, иһиллиэ-биллиэ буоллаҕа.
Нэһилиэк дьаһалтатын баһылыга Наум Устинов: «Норуот күүһэ – көмүөл күүһэ, отонноотоххо оҥоойук туоларыныы бары үтүө саҕалааһыннарбытын нэһилиэк дьоно-сэргэтэ мэлдьи өйүүр, өйдүүр буоланнар, туруоруммут сорукпутун ситиһэн кэллэхпит. Бу тустуу саалата тутуллуутугар спорт миниистирэ Леонид Спиридонов, Ил Түмэн дьокутаата Алиш Мамедов, улуус дьаһалтатын баһылыга Олег Иринеев улаханнык көмөлөстүлэр. Саалабыт уутун-хаарын үлэтигэр кыах тиийэринэн үлэлиэхпит», — диэтэ.
С.И. Заморщиков аатынан тустуу саалата кэнчээри ыччаты, эдэр тустууктары ситиһии, кыайыы-хотуу үрдүк чыпчаалларыгар ыҥырар-угуйар.
Ермолай Скрябин.