1918 сыллаахха Алексей Дмитриевич Широких Дьокуускайдааҕы земскэй управа бэрэссэдээтэлинэн саха норуотун чулуу уолаттарын Максим Аммосовы, Платон Ойуунускайы, Исидор Бараховы кытта бииргэ үлэлиир-хамсыыр. 1923 с тохсунньу 18 күнүгэр ЯЦИК чилиэнэ буолар. ЯЦИК маҥнайгы сессиятыгар 1923 сыл тохсунньу 21 күнүгэр ЯЦИК бэрэссэдээтэлинэн Платон Ойуунускай талыллар, солбуйааччытынан Алексей Широких буолар. Маны сэргэ Алексей Дмитриевич Юстиция наркомун солбуйааччытынан үлэлиир. Бу туһунан архыып матырыйааллара туоһулууллар.
Олунньу 18 күнүгэр биир дойдулаахпыт, Арҕаа Хаҥалас Хахсык нэһилиэгиттэн төрүттээх общественнай-политическай, государственнай диэйэтэл А.Д. Широкихтөрөөбүтэ 140 сылын туолла. Кини аатын сүгэр Төхтүр орто оскуолатыгар үөрэнээччилэр төрөөбүт дойдуларын историятыгар билиилэрин дириҥэтэр соруктаах Алексей Дмитриевич үбүлүөйдээх сылыгар анаммыт нэдиэлэ тэрилиннэ, онно лохтоох кыраайы үөрэтээччилэр, СӨ үөрэҕириитин үтүөлээх учуутала, Хаҥалас улууһун Бочуоттаах олохтооҕо Сина Лиханова, Төхтүр нэһилиэгинБочуоттаах олохтооҕо Николай Ильин Алексей Широких олоҕун уонна төрдүн-ууһун, сыдьааннарын туһунан кылаас чаастарыгар сылдьан кэпсээтилэр. Олохтоох бибилэтиэкэ анал быыстапка туруорда, викторина ыытылынна.
Түмүктүүр тэрээһиҥҥэ ыраахтан-чугастан ыалдьыттар мустан кытыннылар — улуус үөрэҕириигэ управлениятын начальнига Павел Аргунов, СӨ архыыбын сүрүн үлэһитэ,Алексей Широких кинигэтин таҥан оҥорбут Вячеслав Сивцев, Үөрэҕирии түмэлин дириэктэрэ, РФ үөрэҕириитин үтүөлээх учуутала Валентина Ноговицина уонна А.Д. Широких сыдьааннара — РФ доруобуйатын харыстабылын бэтэрээнэ Ольга Широких, эдьиийэ, В. Ларионов аатынан физико—математическай оскуола химия уонна биология предметин учуутала Екатерина Широких,Дьокуускайдааҕы “Туллукчаан” оҕо саадын иитээччитэ Сардаана Захарова, Нам улууһуттан Иннокентий Марков, Покровскай куораттан Светлана Константинова кэлэннэр чулуу киһи үрдүк аатыгар сүгүрүйэн, санааларын үллэстэн, сэргэх кэпсэтиигэ кыттыстылар. Тэрээһини нэһилиэк баһылыга Кэскил Багдарыын салайан ыытта.
Инникитин Алексей Дмитриевич Широких чаҕылхай олоҕун туһунан үөрэтии салгыы ыытыллан, иккис кинигэ тиһиллэн тахсыан сөбүн туһунан кэпсэтиибт түмүктэннэ. Ыччат дьоҥҥо үтүө холобур буолар дьоһун дьоммут ааттара үйэлэргэ ааттана туруохтун.
Мотрена Ефремова, Төхтүр с.