Хаҥалас улууһугар биллэриллибит Дьиэ кэргэн, оҕо аймах сылыгар аналлаах дьоро киэһэ 1-кы Дьөппөн нэһилиэгэр ыытылынна. Эҕэрдэ тылы баһылык солбуйааччыта Лилия Самсонова эттэ. Үс көлүөнэ кыттааччылаах үҥкүү бөлөҕүн толоруутугар «Көлүөнэ үҥкүүтүн» «Сарыал» Култуура киинин испэсэлииһэ Фаина Готовцева туруорда.
Яндреевтар
Биһиги нэһилиэкпитигэр холобур буолар дьиэ кэргэттэр аҕыйаҕа суохтар. Бу дьоро киэһэ 53 сыл бииргэ олорор ытык ыалы — Елена Степановна, Иван Гаврильевич Киприяновтары, төрүт Дьөппөн олохтоохторун, 45 сыл бииргэ олорон 5 оҕону төрөтөн улаатыннарбыт Валентина Ивановна, Спиридон Афанасьевич Яндреевтары, чөл олоҕу тутуспут, ырыаны, саахыматы, дуобаты дьүөрэлээн аргыс оҥостубут Анисия Прокопьевна, Александр Дмитриевич Антипиннары, олоххо көхтөөх көрүүлээх Валентина Васильевна, Юрий Егорович Поповтары, Наталья Михайловна, Тихон Николаевич Платоновтары, Марина Вячеславовна, Константин Егорович Алексеевтары чиэстээтилэр.
Поповтар уонна Платоновтар
Кинилэри сэргэ, чөл олоҕу, спорду өрө туппут эдэр ыаллары ааттаан туран сыанаҕа ыҥырдылар. Ол курдук, 1-кы Дьөппөн П.С.Скрябин аат. орто оскуолатын математика учуутала, нуучча дуобатыгар Саха Өрөспүүбүлүкэтин призера, улууска ыытыллыбыт волейбол күрэҕин чемпиона, призера Надежда Васильевна уонна бу оскуолаҕа физкультура учууталынан үлэлиир хапсаҕайга өрөспүүбүлүкэ абсолютнай чемпиона, спорт маастара, Чебоксарыга ыытыллыбыт аан дойду национальнай көрүҥнэрин оонньуутугар единоборстваҕа 3 миэстэлээх, Алтайга ыытыллыбыт аан дойду национальнай керүҥнэрин оонньуутугар единоборстваҕа 1 миэстэлээх, 2023 с. Саха Өрөспүүбүлүкэтигэр ыытыллыбыт чемпионатка 2 бириистээх миэстэни ылбыт Очиржап Баирович Очиржаповтары. Кинилэр улахан кыыстара Санаайа 6 кылаас туйгун үөрэнээччитэ, волейболунан дьарыктанар, иккис кыыс Айлаана 3 кылаас, художественнай гимнастиканан үлүһүйэн туран кыра эрдэҕиттэн дьарыктанар.
Очиржаповтар
Ситиһиилэрэ да үгүс — Кытайга ыытыллыбыт Аан дойдутааҕы «Великий чайный путь» күрэххэ 1 миэстэ, Чита куоракка ыытыллыбыт «Золото удокана» турнирга 1 миэстэлээх, Сочига ыытыллыбыт «Вера в победу» художественнай гимнастикаҕа Россиятааҕы турнирга 2 миэстэ, Нижний Новгородка ыытыллыбыт Наталья Кукушкина аатынан турнирга 1 миэстэ, Новосибирскайга ыытыллыбыт икки төгүллээх олимпийскай чемпионка Елена Посевина бирииһигэр 1 миэстэ, Хаҥалас улууһун 2023 сыл түмүгүнэн «Лучшая гимнастка» аатын ылан дьонун үөртэ. Кыралара, мурун бүөтэ киһилэрэ Арсалан 3 саастаах. Очиржаповтары кэскилээҕи кэрэһэлээҥ, ыллыктааҕы ырыҥалааҥ диэн алгыыбыт!
Сыромятниковтар
Элбэх оҕолоох дьиэ кэргэн Юлия Олеговна, Николай Александрович Сыромятниковтар буолаллар. Ыал ийэтэ санаторнай оскуола испэсэлииһэ, аҕалара «Туймаада нефть» АУо операторынан үлэлиир. Оҕолор оскуола, «Кэскил» оҕо саадын иитиллээччилэрэ.
Нэһилиэкпит биир тутаах, эдэр, кэскиллээх ыала Вера Андреевна, Спиридон Спиридонович Яндреевтар бэйэ дьыалатын тэринэн, хороҕор муостааҕы ууһатан, үрүҥ илгэни дэлэтэн тыа хаһаайыстыбатын ыарахан үлэтигэр ылсан үлэлии сылдьаллар. Уоллара Эркин 6 кылааска, кыыстара Виолетта 9 кылааска ситиһиилээхтик үөрэнэллэр.
Ийэ — сирдээҕи аанньалбыт, күн сирин көрдөрбүт киһибитин ылбаҕай ырыаҕа ыллыыбыт. Аҕабыт — эрэнэр эркиммит, көмүскүүр, харыстыыр киһибитин хомоҕой хоһооҥҥо хоһуйабыт. Оҕобут — сиэдэрэй бэлэхпит, олохпут салҕанар тутула. Дьиэ кэргэн — тапталга бигэммит уйабыт, иһирэх иэримэ дьиэбит. Дьиэ кэргэҥҥит бигэ туруктаннын, оҕолоргут, сиэннэргит тапталларыгар уйдаран уһун олохтонуҥ диэн алгыспын аныыбын.
Санатар буоллахха, быйыл Арассыыйаҕа биллэриллибит Дьиэ кэргэн сылыгар «Всей семьей» бырайыак үлэлиир. Бу бырайыак чэрчитинэн кыттааччылар араас тэрээһиҥҥэ сылдьан, уустуга суох сорудахтары толорон бириистээх оонньууга кыттыахтарын сөп. Бырайыак сайта👉всейсемьей.рф
Анастасия Мордовская, Тиит Эбэ с.