Сааскы саймаархай күн Дьокуускайга «Өрөспүүбүлүкэ дьахталларын «Подруги-Дьүөгэлэр» аһаҕас форум» эрэгийиэннээҕи общественнай хамсааһын көҕүлээн тэрийбит «Общая воля – во благо» Саха сирин дьахталларын II-с сийиэһэ буолан ааста. Манна Хаҥалас улууһуттан «Ил Эйгэ» дьахталлар сэбиэттэрин бэрэссэдээтэлэ Фекла Варламова салалтатынан Покровскай куорат, Нөмүгү, Сиинэ, Дьэр, Бэстээх нэһилиэктэриттэн дьахтар хамсааһынын көхтөөх кыттыылаахтара дэлэгээт быһыытынан сырыттылар.
— Үс күннээх улахан тэрээһиҥҥэ дойдуга ыытыллар улахан үлэлэр тула киэҥ хабааннаах, туһалаах элбэх кэпсэтии, санаа атастаһыыта барда. Туһааннаах министиэристибэлэр бэрэстэбиитэллэрэ «Үөрэҕирии», «Доруобуйа харыстабыла», «Демография», «Культура», «Экология» федеральнай национальнай бырайыактар Саха сиригэр олоххо киириилэрин туһунан сийиэс кыттыылаахтарыгар билиһиннэрдилэр.
Пленарнай мунньахха Ил Дархан Айсен Николаев кытынна. Кини өрөспүүбүлүкэбит киһи хапытаалын сайыннарыыга уонна дьиэ кэргэн сыаннастарын бөҕөргөтүүгэ куруук холобурга сылдьар, онно, биллэн турар дьахтар аймах оруола үрдүгүн бэлиэтээтэ.
Сийиэс чэрчитинэн кэрэ аҥардар «Белая Роза» медкииҥҥэ, ХИФУ клиникаларыгр көрдөрүнэр кыахтаннылар. Дьахтар хамсааһына уопсастыбаҕа биир төһүү уонна сүрүннүүр күүс буоларын бу сийиэс өссө биирдэ туоһулаата уонна үлэлииргэ бэлэмнээхпитин бигэргэттэ, — диэн Фекла Варламова санаатын үллэһиннэ.
Ольга Гермогенова.