«Хаарбах туруктаах дьиэттэн көһөммүт үөрүүбүт үгүс…»

    Өктөм нэһилиэгэр быйыл, дэриэбинэбит килбэйэр киинигэр, 4 этээстээх, толору хааччыллыылаах дьиэбит үлэҕэ киирэн, биһиги, олохтоохтор дьолбут муҥура суох!

    Бу иннинэ олорбут уопсайбыт, төһө да дьоллоох кэмнэри бэлэхтээтэр, 1966 сыллаахха тутуллубут буолан, 2016 сылга хаарбах  туруктаммыта.  Бу  уопсайга мин оруобуна 23 сыл олорбутум, оҕом манна улааппыта. Онтон дьэ «Переселение граждан из ветхого и аварийного жилья» диэн «Жилье и городская среда» национальнай бырайыак иһинэн үлэлиир бырагыраамаҕа киирсэммит, 4 сыл буолан баран, 2020 сыллаахха дьиэбит барахсан бастакы сыбаайата түспүтэ. Уопсайбытыттан турар сирэ чугас буолан, этэргэ дылы, кэлэ-бара сылдьан тутуу хаамыытын көрөр этибит, олус элбэҕи ыралыыр, саныыр этибит, онтубут быйыл туолан, дьиэбитигэр үөрүүлээх быһыыга-майгыга киирэммит, үөрүүбүт үгүс!

Мин 2 этээскэ 1 хостоох кыбартыыра ыллым, урукку дьиэбин кытары кээмэйэ тэҥ, онон олус үчүгэй. Кыбартыыралар бары сып-сырдыктар, киһи сүргэтэ аҥардас онтон да көтөҕүллэр. Манна саастаах да дьон, эдэр ыал да дьон көһөн киирдилэр, онон аҕам саастаахтар, үүнэр көлүөнэбит бэрт үчүгэй усулуобуйаҕа олороллоруттан бары да астынабыт. Биһиэхэ, тыйыс усулуобуйаҕа олорор саха дьонугар, бу маннык бырагыраамалар олохпутун олус чэпчэтэллэр дии саныыбын. Республикабыт, дойдубут салалтата муударай быһаарыыларынан бу маннык национальнай бырайыактар, бырагыраамалар үлэлээн, дьон олоҕо тупсар, чэчириир.

Вера ПОПОВА, Өктөм нэһилиэгин мунньаҕын депутата.