Өктөм нэһилиэгин «Сардаҥа» түмсүүтүгэр бары өттүттэн дэгиттэр дьон мустан ырыанан-үҥкүүнэн, спорт көрүҥнэринэн дьарыктаналлар.
Ол курдук, биир дойдулаах аҕам саастаахтарбыт хаһыс да сылын кэрэ хамсаныылаах бальнай үҥкүүлэри баһылыыллар. Бастаан дьарыгы Өктөмҥө биллэр хореограф Ульяна Осипова тэрийэн ыытара. Түмсүү үҥкүүһүттэрэ улууска, өрөспүүбүлүкэҕэ ыытыллар күрэхтэргэ өрүү ситиһиилээхтик кытталлар. Билигин үҥкүүһүттэри кытта «Барҕарыы» култуура киинин методиһа Надежда Черкашина үлэлэһэр.
Бу күннэргэ Нам улууһун М.К. Аммосов аатынан Хатырыктааҕы култуура-спорт киинигэр «Вальс Победы» өрөспүүбүлүкэтээҕи бырайыак чэрчитинэн «Радуга» бальнай үҥкүүлэргэ өрөспүүбүлүкэтээҕи фестиваль-куонкурус буолан ааста. Күрэхтэһии 7 саастаах оҕолортон саҕалаан аҕам саастаах дьоҥҥо 2 бөлөҕүнэн, хас да категорияҕа арахсан ыытылынна. Манна биһиги «сардаҥаларбыт» «ситиһиилэрин холбуйаларыгар» өссө эбии кыайыыны аҕаллылар.
«Аҕа дойду үҥкүүлэригэр» «Гранд-сеньоры» III категорияҕа Өктөм ытык ыала Ольга уонна Петр Исаковтар, «Гранд-сеньоры» I категорияҕа Наталия Крылова, Иван Христофоров, Елизавета Большакова, Хаҥалас улууһун алгысчыта, төрүт култуураны олохтооччу Андриан Белолюбскай, «Сеньоры» II категорияҕа Надежда Черкашина, Иван Христофоров призер буоллулар. Маны таһынан «Гранд-сеньоры» II категорияҕа Галина Острельдина уонна Иван Христофоров күрэххэ киирбэккэ көрдөрүүгэ үҥкүүлээтилэр. Күрэхтэһээччилэр «Рио-рита», «Большой фигурный вальс», «Вальс Бостон», «Московская кадриль» толордулар. Онон бука бары үҥкүү бырааһынньыгар сылдьан үөрэн-көтөн, сүргэлэрэ көтөҕүллэн кэллилэр. Көхтөөх дьоммутугар инникитин да үҥкүү эйгэтин баһылыылларыгар, өссө элбэх дьарыктанааччылары, үрдүк ситиһиилэри баҕарабыт!
Татьяна Владимирова.