Кулун тутар 19 күнүгэр Өлүөнэ туруук хайаларыгар VIII-с аан дойдутааҕы «Азия оҕолоро» оонньууларын төлөнүн уматыахтара. Ол бэлиэ түгэн чэрчитинэн манна кулун тутар 1-5 күннэригэр өрөспүүбүлүкэбит бастыҥ мууска-хаарга уустара күрэхтэстилэр, Өлүөнэ эбэ дьэҥкир мууһуттан араас оҥоһуктары, скульптуралары айан-чочуйан таһаардылар. «Начало побед» диэн ааттаммыт фестиваль муус оҥоһуктара оҕо саас, спорт тиэмэтигэр сыһыаннаах буоллулар.
«Өлүөнэ туруук хайалара» Национальнай паарка пресс-сулууспата иһитиннэрбитинэн, бары үлэлэри муус-хаар оҥоһуктарга норуоттар икки ардыларынааҕы фестиваллар хас да төгүллээх кыайыылаахтара уонна призердара, Россия худуоһунньуктарын Сойууһун чилиэнэ, Канада скульптордарын ассоциациятын чилиэнэ Егор Степанов бэрэссэдээтэллээх дьүүллүүр сүбэ сыаналаата.
Ол курдук, кыайыылааҕынан Хатас нэһилиэгиттэн сылдьар Максим Охлопков уонна Семён Баянаков буоллулар, кинилэр «Победный выстрел сквозь время» диэн ааттаабыт үлэлэринэн 200 тыһ. солк. суммалаах сертификаты бириис туттулар.
Ньурба улууһуттан «Өҥөлдьө» хамаанда (Герасим Максимов, Дмитрий Максимов) «Будущий чемпион» үлэлэринэн 2-с миэстэ буоллулар. Бириистэрэ – 150 тыһ. солк. сертификат.
Үһүс бочуоттаах миэстэҕэ Нам улууһуттан кэлэн кыттыбыт «Муус Уус» хамаанда (Александр Шадрин, Дмитрий Шадрин) «Лови драйв» композицияларынан тигистилэр, 100 тыһ. солк. сертификатынан наҕараадаланнылар.
«Өлүөнэ туруук хайалара» Национальнай паарка анал бирииһин «Долгун» хамаанда (Нам улууһа) «Путь к победе» үлэлэрин иһин ыллылар.
Саха сирэ бүттүүнэ киэн тутар кэрэ-мааны айылҕалаах, ураты күүстээх ытык сиргэ, айылҕа күүһүн кэрэһэлиир очуостарга сылдьыан баҕалаах киһи сыл аайы элбиир. Быйыл кыһыҥҥы сезоҥҥа күнүнэн сынньана тиийэр туристарга анаан сылаас иттэр дьиэ, минньигэс астаах кафе баар. Таарыйа хаартыскаҕа түһэргэ саха төрүт сылаас таҥаһа кытары баар. Оттон киэһээҥҥи өттүгэр Өлүөнэ очуостара уотунан сырдатыллар буолла. Таас хайа тэллэҕэр муус каток оҥоһуллан Россия биллэр спортсменнарын көрсөргө бэлэм, онон дьон-сэргэ интэриэһэ, болҕомтото өссө үрдээтэ. Өлүөнэ очуостара ыалдьыттары көрсөргө бэлэм!
Ольга Гермогенова.
Хаартыска: Наталья Григорьева.