«Чолбон өй күрэһэ» Покровскайга буолла

Бу күрэҕи «Чолбон» сурунаал эрэдээксийэтэ Покровскайга улуустааҕы бибилэтиэкэҕэ кэлэктиип көмөтүнэн Россияҕа Дьиэ кэргэн сылыгар анаан тэрийдэ. Күрэс туһунан бибилэтиэкэр Валентина Колесова бу курдук кэпсээтэ:

Кыттааччылары сурунаал эрэдээктэрэ Гаврил Андросов эҕэрдэлээтэ уонна бу күн саха литературатын сырдатар, пропагандалыыр, дьиэ кэргэттэри булар уонна кинилэри киэҥ эйгэҕэ таһаарар биһирэмнээх бырайыагар кыттар дьоҥҥо ситиһиилэри баҕарда.

Күрэскэ алта дьиэ кэргэн көхтөөх хамаандалара кэлэн кытыннылар, билиилэрин тургустулар, араас ыйытыыларга хоруйдаатылар. Түмүккэ Улахан Аантан  Афанасьевтар (ийэлэрэ Варвара Александровна, уола Влад, эһээлэрэ Александр Михайлович) иллээх дьиэ кэргэнэ кыайыылааҕынан таҕыста. Иккискэ Кытыл Дьураттан Осиповтар (ийэлэрэ Ньургуйаана Александровна уолунаан Сайаанныын, эбээлэрэ Мира Николаевна Петрова), үһүскэ Покровскайтан Острельдиннар ийэлэрэ Ольга Васильевна уола Аманныын, эһээлэрэ Николай Михайлович кыттан бэлиэтэннилэр.

2-с Дьөппөнтөн Самсоновтар, Скрябиннар, Покровскайтан Филипповтар эрбии биитинии тургутустулар. Кыайыылаах дьиэ кэргэн Афанасьевтар муус устар 11 күнүгэр өрөспүүбүлүкэ күрэҕэр ыҥырылыннылар.

Санатар буоллахха, быйыл Арассыыйаҕа биллэриллибит Дьиэ кэргэн сылыгар «Всей семьей» бырайыак үлэлиир. Бу бырайыак чэрчитинэн кыттааччылар араас тэрээһиҥҥэ сылдьан, уустуга суох сорудахтары толорон бириистээх оонньууга кыттыахтарын сөп. Бырайыак сайта👉 всейсемьей.рф

Людмила Аммосова.