Быйыл Россияҕа Дьиэ кэргэн, Саха сиригэр Оҕо саас, улууска Дьиэ кэргэн, оҕо аймах сылларынан Покровскай куоракка элбэх үлэ былааҥҥа киирэн бииртэн биир тэрээһин буола турар.
Покровскай куоракка олорор аҕалар оҕолорунаан анал байыаннай дьайыы кыттыылаахтарын өйөөн, улууска ыытыллар «Аҕа күрэҕэр» кыттарга путевка иһин илин-кэлин түһүстүлэр. Манна аҕалар уолаттарынаан Покровскай куорат 1-кы, 2-с, 3-с №№-дээх оскуолаларыттан уонна гимназияттан кытыннылар.
Оҕо эт-хаан, өй-санаа өттүнэн сөптөөхтүк сайдыыта, сиэрэ-майгыта чочуллуута, дьоҕура-талаана арыллыыта, биллэн турар, дьиэ кэргэҥҥэ төрүттэнэр. Бу күрэхтэһии сыала-соруга диэн уопсастыбаҕа аҕа оруолун үрдэтии, чөл олоҕу тарҕатыы, норуот үгэс буолбут спортивнай көрүҥнэрин сайыннарыы буолар.
Алта түһүмэхтээх күрэххэ бастакынан хамаандалар бэйэтин дьиэ кэргэнин, үтүө үгэстэрин, ситиһиилэрин, сөбүлүүр дьарыктарын туһунан кэпсээтилэр, билиһиннэрдилэр. Онтон салгыы 5 миэтэрэ усталаах тиит бэрэбинэни икки өттүн сирэйдии сүгэнэн суордулар. Мас бэлэмнээһиҥҥэ илин-кэлин түһүстүлэр. Бу барыта ким төһө түргэнник туттарыгар-хаптарыгар буолан олус күүрээннээх буолла.
Биир, киһи сэниэтин ылар көрүҥүнэн, «Ойбон алларыыта» буолар. Халыҥ хаары күрдьэҕинэн тоҕута силэйтэлээн, ыраастыы охсон баран хамаандалар ойбон алларыыга түһүнэн кэбистилэр. Аҕа анньыытынан мууска курдурҕаччы түһүнэр, уола тута кэнниттэн ыраастаан иһэр. Салгыы, 5 миэтэрэ үрдүктээх остуолбаҕа тахсыы аҕалаах уолга кытаанах тургутугунан буолла.
Уопсай түмүккэ алын бөлөххө Алексей Федотов уола Богданныын, үөһэ бөлөххө Николай Латышев, гимназияҕа IX кылааска үөрэнэр уолунаан Айааллыын бастаатылар.
Күүрээннээх күрэхтэһии кыайыылаахтарын уонна призердарын тэрийээччилэр уонна спонсордар кубоктарынан, мэтээллэринэн, дипломнарынан уонна сыаналаах бириистэринэн наҕараадалаатылар. Бу дьон-сэргэ сөбүлээбит күрэхтэһиитин Спорт дыбарыаһын чулуу үлэһиттэрэ уонна Покровскай куорат Аҕаларын сүбэтин чилиэннэрэ сүүрэн-көтөн ыыттылар. Ханнык баҕарар улахан да, кыра да тэрээһин бэрт элбэх түбүктэн тахсар. Аҕалар хамсааһыннарын өйүүр, үтүө санаалаах дьон – «Якутлесресурс» САТ дириэктэрэ Авксентий Слепцов мас бэлэмнээһинигэр МТЗ тыраахтарынан, ОДьХХ Хаҥаластааҕы филиалын дириэктэрэ Дмитрий Николаев, кылаабынай инженер Семен Пахомов көмөлөстүлэр. Итини сэргэ Спорт дыбарыаһын хоһууттарыгар (дириэктэр Олег Иванов, солбуйааччыта Иван Никитин), «Серега» маҕаһыын (Оксана Иванченко), «Фиалка» маҕаһыын (Саргылана, Анатолий Константиновтар), «Текстиль» (Юрий Яковлев), «Опт маркет» (Мирхамидин Мирзаитов) бас билээччилэригэр, урбаанньыттар Виктор Константиновка, Александр Лебедевкэ, «Индрайвер» (Александр Рожин) такси өҥөтүн толорооччу элбэх аҕаларга, оскуолалар аҕа сүбэлэрин бэрэссэдээтэллэригэр Василий Дьячковскайга, Дьулустан Андреевка, Алексей Ожгибесовка олус туһалаах, дьоһуннаах бириистэри туруорбуттарыгар, көмөлөспүттэригэр махтанабын.
Тэрээһин табылынна. Аҕа уолун сатабылга ханна да сырыттар үөрэтэр, уһуйар.
Уйбаан УЙГУУРАП, Покровскай к. аҕаларын түмсүүтүн бэрэссэдээтэлэ.
Петр ДМИТРИЕВ хаартыскаҕа түһэриитэ.
Санатар буоллахха, быйыл Арассыыйаҕа биллэриллибит Дьиэ кэргэн сылыгар «Всей семьей» бырайыак үлэлиир. Бу бырайыак чэрчитинэн кыттааччылар араас тэрээһиҥҥэ сылдьан, уустуга суох сорудахтары толорон бириистээх оонньууга кыттыахтарын сөп. Бырайыак сайта👉 всейсемьей.рф