А.С. Данилова аатынан “Барҕарыы” култуура киинэ олунньу, кулун тутар ыйдарыгар оҕолорго, улахан дьоҥҥо өрөспүүбүлүкэтээҕи «Сардаҥалаах Аартык» ырыа-үҥкүү күрэҕин 30-с сылын тэрийэн ыытта. Манна барыта 400 оҕо кыттан илин-кэлин түһүстэ.
Быйылгы күрэххэ муодаҕа бэртээхэй сахалыы аныгы таҥастары Покровскайтан «Айаана» (салайааччы Яна Романова), Чкаловтан “Мичийэ” (салайааччы Инна Архипова) муода тыйаатырдара чаҕылхайдык көрдөрдүлэр.
“Музыка барыбытыгар” диэн барылынан салайааччылар элбэх өрүттээх сыралаах үлэлэрэ көстөр. Ол курдук, Өктөм уһуйаанын иитиллээччилэрэ (салайааччы Анисия Антонова) ньуосканан лаһыгыраччы, тэбис-тэҥҥэ олус тэтимнээхтик оонньоон 1 истиэпэннээх, Чурапчыттан “Тэтим” ансаамбыл (салайааччы Розалия Попова) 2-с истиэпэннээх, Покровскайтан “Сардаана” уһуйаан “Васильки” ансаамбыла (салайааччы Лилия Григорьева) 3-с истиэпэннээх лауреат буоллулар. Улахан оҕолорго Хачыкааттан «Аккорд» ансаамбыл (салайааччы Елена Галимон) бастаата, Күөрдэмтэн “Тэтимнээх уоланнар” этно-бөлөх (салайааччы Галина Иванова) иккис буоллулар.
Түмүккэ «Лауреат лауреатов» анал ааты Покровскайтан Уйгулаана Харлампьева, “Сыл бастыҥ салайааччыта” ааты Дьокуускай куораттан Роза Спиридонова ылан үөрүүлэрэ үрдээтэ. Ону таһынан “Ырыа коллективын бастыҥ салайааччыта» — Анисия Антонова, «Норуот үҥкүүтүн бөлөҕүн бастыҥ салайааччыта» — Мария Семенова, “Эстрада үҥкүүтүн бастыҥ салайааччыта”- Руслана Платонова, «Бастыҥ ырыа коллектива» анал ааты Дьокуускайтан «Күлүмчээнэ” ырыа ансаамбыла ылан сүргэлэрэ көтөҕүлүннэ.
Улахан дьоҥҥо барыта 199 киһи элбэх улуустартан кытынна. Манна муҥутуур Гран-При кыайыылааҕынан Амма Бөтүҥүттэн «Махтал» үҥкүү бөлөҕө (салайааччы Константин Попов) буолла. “Ырыа коллективын бастыҥ салайааччыта” — Нөмүгүттэн Юлия Попова, «Норуот үҥкүүтүн бастыҥ салайааччыта» анал ааты Өктөмтөн «Дайар» үҥкүү бөлөҕүн салайааччыта Надежда Черкашина ыллылар.
Дьэ бу курдук, элбэх оҕо-уруу, улахан дьон сардаҥалаах аартыгынан дабайан үрдүктэн үрдүккэ тахсан, элбэх ситиһии көтөллөнөн, олохтон дуоһуйа, үөрэ-көтө,айар-тутар баҕалаах олороллоро биһигини инникигэ кынаттыыр.
Федора Фомина.