Өрөспүүбүлүкэҕэ муус устар маҥнайгы өрөбүлүгэр Аҕа күнүн бэлиэтиибит. Бу бырааһынньык бастакы президеммит Михаил Николаев ыйааҕынан 1999 сыллаахха олохтоммута. Онтон 2017 сылтан Ил Дархан уурааҕынан ый иккис өрөбүлүгэр Уол оҕо күнэ бэлиэтэнэр буолбута.
Өрөспүүбүлүкэҕэ бу күннэргэ туһуламмыт араас тэрээһиннэр ыытыллаллар. Ол курдук, «Рыбалка Октем» туристическай түмсүү салайааччыта Алексей Андреев Сахабыт сиригэр Дьиэ кэргэн уонна оҕо саас сылын чэрчитинэн уоллаах аҕаларга муус аннынан балыктааһыҥҥа күрэхтэһии ыытта. Манна Дьокуускай куораттан, Хаҥалас, Нам улуустарыттан барыта 20 кыттааччы кэлэн Өктөм аннынан Өлүөнэ эбэҕэ балыктаатылар.
Аҕаларга анаан буурдаан муус алларыыга Хатас бөһүөлэгиттэн Вадим Пинигин тэҥнээҕин булбата, II-с миэстэҕэ Өктөмтөн Тит Данилов тигистэ уонна III миэстэни Нам улууһуттан Анатолий Павлов ылла.
Бастакы балыгы Тимур Артамонов таһааран анал аакка тигистэ. Маны таһынан Айтал Иванов «Саамай улахан балык», «Саамай кыра балык», «Дэҥҥэ көстөр балык» үс анал ааттары ылан үөрдэ-көттө. Оттон сүрүн күрэх түмүгүнэн Дьокуускай куораттан сылдьар ыалдьыттар кыайыы өрөгөйүн биллилэр — I миэстэ Айтал Иванов буолла, II миэстэҕэ Коля Горохов уонна III-кэ Федот Куличкин таҕыстылар.
Сааскы сибиэһэй салгыҥҥа бу курдук дьиэ кэргэҥҥитин кытта дуоһуйа сынньаныҥ!
Санатар буоллахха, быйыл Арассыыйаҕа биллэриллибит Дьиэ кэргэн сылыгар «Всей семьей» бырайыак үлэлиир. Бу бырайыак чэрчитинэн кыттааччылар араас тэрээһиҥҥэ сылдьан, уустуга суох сорудахтары толорон бириистээх оонньууга кыттыахтарын сөп. Бырайыак саайта всейсемьей.рф
Татьяна Владимирова.