Сыыдам сырыылаах хайыһардар дайдылар…

Өр күүтүүлээх сааскы кэм түргэнник ааһар, онон сибиэһэй салгыҥҥа элбэхтик сылдьан, хайыһардаан, хаҥкылаан, сыыртан сырылаан оонньоон хаалыахха наада. Муус устар ыйга маҥан хаардыын быраһаайдаһабыт, онон сибиэһэй салгыҥҥа тахсан сынньаныаххайыҥ!

Өктөм нэһилиэгэр чөл олоҕу тарҕатааччы, Арктическай судаарыстыбыннай агро-технологическай университет Өктөмнөөҕү салаатын бэтэрээн педагога Михаил Афанасьевич Засимов бирииһигэр ыччаттарга анаан хайыһарынан күрэхтэһии (эстафета-биатлон) буолан ааста. Тэрээһин филиал 25 сыллаах үбүлүөйүн чэрчитинэн уонна Михаил Афанасьевич 85 сааһыгар аналлаах ыытылынна.

Санатар буоллахха, Михаил Засимов былырыын кыһын -50-60 кыраадыс томороон тымныыга хайыһардыы сылдьар видеота интернет ситимигэр, тэлэбиисэргэ тахсан дьону-сэргэни сөхтөрбүтэ. Ытык кырдьаҕас быйыл да дьарыгын тохтоппото, кыһыны быһа хайыһардаан кэллэ.

Быйылгы тэрээһиҥҥэ анаан биир килэмиэтир курдук трасса астарбыттара. Күрэхтэһии иккиһин ыытылынна. Эстафета түмүгүнэн кыайыылаахтар билиннилэр: I миэстэҕэ Өктөм нэһилиэгин хамаандата, II миэстэҕэ АГАТУ Өктөмнөөҕү филиалын хамаандата уонна III миэстэҕэ Дьэр нэһилиэгин хамаандата.
Онтон соҕотохтуу бириэмэлэринэн кыргыттарга Өктөм нэһилиэгиттэн I миэстэҕэ Нюргуяна Куприянова, II миэстэҕэ эмиэ Өктөмтөн Сандаара Иванова уонна III миэстэҕэ Дьэр нэһилиэгиттэн Ангелина Сысоева таҕыстылар. Уолаттарга I миэстэҕэ Николай Адъютантов (Өктөм), II миэстэҕэ АГАТУ филиалын устудьуона Алексей Аргунов уонна III миэстэҕэ эмиэ филиал устудьуона Александр Габышев кыайыылаах буоллулар. Кыайыылаахтарга сыаналаах бириис, анал мэтээл туттардылар.

Засимовтар дьиэ кэргэттэрин аатыттан кыыстара Марианна Михайловна АГАТУ ректорыгар Валерий Федоровка, Өктөмнөөҕү филиал кэлэктиибигэр, «Өктөм нэһилиэгэ» МТ дьаһалтатыгар махтал тылларын тириэртэ, олус үчүгэй тэрээһин буолан ааспытынан барыларын эҕэрдэлээтэ уонна «Саамай эдэр кыттааччы» диэн анал ааты иҥэрэн 14 саастаах Сандаара Ивановаҕа бириис туттарда.

Оттон биһиги, олохтоохтор, чуолаан бэтэрээн педагог Михаил Афанасьевичка бачча сааһыгар диэри спордун ыһыктыбакка сылдьарыгар, ыччакка тарҕатарыгар махтанабыт уонна эһиил эмиэ өссө киэҥ далааһыннаах күрэхтэһии тэрийэригэр баҕарабыт.

Татьяна Владимирова.