Улуу Кыайыы күнүн көрсө бу амарах санаа аахсыйата хардыыта кэҥээтэ. Онно көҕүлээччилэринэн Хаҥаласпыт салайааччылара, өрөспүүбүлүкэ таһымыгар үлэлии сылдьар биир дойдулаахтарбыт буоллулар. Ол курдук улууспут баһылыга Олег Иринеев, үтүө үгэһинэн хаһыаппытыгар хас да бэтэрээҥҥэ суруттаран дьонугар-сэргэтигэр үтүө холобуру уруккутун курдук көрдөрдө. Дьаһалтабыт үлэһиттэрэ бэркэ суруттараллар. Улуус мунньаҕын салайааччыта Анатолий Антонов эмиэ биир бастакынан хас да хаһыаты бэтэрээннэргэ, ону сэргэ анал байыаннай дьайыыга сылдьар уолаттарбыт дьиэ кэргэттэригэр, инбэлииттэргэ, элбэх оҕолоохторго суруйтаран үөрдэр. Салайааччыларбыт дьокутааттарга, дьаһалталар, тэрилтэлэр үлэһиттэригэр ыҥырыы таһааран көх-нэм буолалларыгар махтанабыт.
Бөдөҥ тэрилтэлэрбититтэн Ил Түмэҥҥэ дьокутааппыт, ытыктанар киһибит Алиш Мамедов салайар “Якутцемент” АО бэтэрээннэригэр өрүү хаһыат бэлэхтиир – 100 экземпляры сурутан цементниктар улууспут сонунун билэ олороллор.
Кэлин сылларга үгүс кырдьаҕастарбыт кыһынын оҕолорун көрүүтүгэр Дьокуускайга кыстыыллар. Кинилэргэ сүнньүнэн «Хаҥалас» уопсастыба чилиэннэрэ хаһыат сурутан көмөлөһөллөр. Хаҥаластар улуустарын сонунун күнүнэн тутан сибээстэрин быспакка үйэлэрин тухары аахпыт хаһыаттарын тута олороллоро олус бэрт. Киһиэхэ кыра да наада.
Манна биир дойдулаахтарбыт Ил Түмэн дьокутаата, «Хаҥалас» общество салайааччыта Афанасий Владимиров, улахан дуоһунаска сылдьар Николай Макаров, Вячеслав Алексеев көҕүлээччилэринэн буолан хастыы да бэтэрээҥҥэ Кыайыы күнүн көрсө сэмэй бэлэх оҥордулар.
Күндү хаҥаластар, үтүө холобур батыһааччылардаах буоллун, аахсыйабытыгар кыттын, көҥүл олохпут оҥкулун уурсубут ытык дьоммутугар үөрүүнү бэлэхтээҥ сыл аҥарыгар сыаната да удамыр – 552 солк. 78 харчы. Тиэтэйиҥ, биэрэр илии тутайбат!
Редакция.