Өктөм нэһилиэгэр уу ылар сиригэр 258 дьиэ турар. Манна уопсайа 613 киһи олорор. Ыксаллаах быһыы-майгы үөскүүр түгэнигэр быстах кэмҥэ дьону олохтуур сирдэринэн П.И. Шадрин аат. Өктөм орто оскуолатыгар 100 миэстэни уонна М.Е. Николаев аат. Үөрэх-билим киинигэр 50 миэстэни анаатылар. Ону сэргэ, олохтоох дьаһалта быйыл саҥа утуйар таҥас, хомуллар ороннору бэлэмнээтэ.
Хас сылын аайы халаан уутун утары үлэ чэрчитинэн өрүс кумаҕын мунньан, быһыты бөҕөргөтөргө уонна кытыллары кытаатыннарыыга тутталлар. Элбэх кумаҕы мунньарга олохтоох, улахан тиэхиньикэлээх уолаттар хас да күн сылдьан үлэлииллэр. Быйыл манна Тыа хаһаайыстыбатын министиэристибэтин иһинэн үлэлиир сири мелиорациялааһын уонна тыа хаһаайыстыбатын уунан хааччыйыы управление тиэхиньикэтэ кэлэн көмө буола сылдьар. Маны таһынан, бу күннэргэ кумахтары кууллаһын үлэтэ саҕаланыахтаах.
Өктөм нэһилиэгин олохтоохторо бары сэрэтиллэн, сыыйа-баайа малларын-салларын хомуна, хаһаайыстыбаларын дьаһана сылдьаллар.
Татьяна Владимирова.