Аан дойдутааҕы үҥкүү күнүгэр Өктөмҥө А.С. Данилова аатынан «Барҕарыы» Култуура киинин тэрийиитинэн үгэс буолбут үҥкүү бырааһынньыга буолан ааста. Агротехнологическай университет Өктөмнөөҕү салаатын уораҕайыгар дьон-сэргэ тоҕуоруһа муһунна. Дьоро киэһэни «Дьиэрэй» бэтэрээннэр түмсүүлэрэ муус маҥан таҥастаах, дэйбиирдээх киирэн, аа-дьуо сэгэлдьийэн Алгыс үҥкүүтүнэн саҕалаатылар. «Сардаҥа» түмсүү 12 Далбар хотуна нуучча былааттаах үҥкүүтүн олус табыллан, киһи эрэ сөҕүөх курдук толорбуттарын дьон ытыс дохсун тыаһынан бигэргэтэн биэрдилэр.
Быйылгы өрөспүүбүлүкэтээҕи бальнай үҥкүү күрэҕин кыайыылаахтара Ольга, Петр Христофоровтар, Наталья Крылова, Иван Христофоров, Евдокия Александрова, Андриан Белолюбскай, Галина Острельдина умнуллубат вальсы, рио-рита, падеспань, сударушка, тустеп үҥкүүлэри киһи эрэ кэрэхсиэн үҥкүүлээтилэр.
Өктөмнөөҕү билим-үөрэтэр киин төрөппүттэрин “Арылык” бөлөҕө 2023 сыллаахха өрөспүүбүлүкэтээҕи «Сардаҥалаах Аартык», улуустааҕы “Танцевальная палитра” үҥкүү күрэһин “Гран-При” хаһаайыттарынан буолбуттара. Кинилэр «Узбекскай үҥкүүлэрэ» тэтиминэн, эрчиминэн саала иһин толорон кэбистэ, иккис үҥкүүлэрэ сабыс саҥа буруолуу сылдьар “Венгерскай үҥкүү” дохсун ытыс тыаһынан доҕуһуолланна.
Чугас сытар Төхтүр нэһилиэгиттэн оскуола оҕолорун үҥкүү бөлөҕө (салайааччы Довна Афанасьева) сахалыы үҥкүүлэри бэлэхтээн көрөөччүлэри астыннардылар. «Сардаҥалар” кылабачыйан киирэн биир тыынынан «Сэлээппэлээх үҥкүүнэн» урукку кэми санатан таҕыстылар. Устудьуоннар “Эҕэрдэ үҥкүүлэрэ” эдэр саас эрчимин, дьоллоох саас доҕуһуолун, сааскы сайаҕас салгын, күүстээх тыал түһэн ааспытын курдук тыыны көрөөччүлэргэ тиэрдэн, дьон ытыһын тыаһа өргө диэри уҕараабата. Бүтэһиккэ үҥкүүһүттэр бары тахсан флешмоб үҥкүүлээн, дьону көҕүлээн, саала иһэ бары туран үҥкүүлэспитэ, кырдьык да,үҥкүү бырааһынньыгын үрдүк чыпчаала буолла.
Бэлиэтээн эттэххэ, бары үҥкүүлэри «Барҕарыы» КК методиһа Надежда Черкашина туруоран, бэлэмнээн таһаарбыта олус табыллан, бары да астынныбыт.Үҥкүүһүттэр салайааччыларыгар махтанан сибэкки дьөрбөтүн, сэмэй бэлэхтэрин туттардылар. Тэрийээччилэр бары үҥкүүһүттэргэ махтанан туран минньигэс тордунан күндүлээтилэр.
Федора Фомина, Өктөм с.