Мин буойун, РСФСР, САССР үтүөлээх учуутала Иван Николаевич Рожин туһунан суруйарга сананным. Кини муус устар 14 күнүгэр 1922 сыллаахха Таатта улууһугар төрөөбүтэ. Алын кылааһы дойдутугар бүтэрэн баран куоракка оскуолаҕа салгыы үөрэнэр, ол кэнниттэн Дьокуускайдааҕы педрабфакка киирэн үөрэнэ сырыттаҕына Аҕа дойду сэриитэ саҕаланар. Иван Рожин 1941 сыллаахха Советскай Армия кэккэтигэр ыҥырыллар. Бастаан Омскайдааҕы байыаннай пехотнай училищеҕа үөрэнэр, олкэнниттэн 1942 сыллаахха Волховскай фронт састаабыгар киирэн Ленинград аттыгар Силявино дэриэбинэҕэ уоттаах сэриигэ кыттыбыта, улаханнык бааһыран Воронеж куорат госпиталыгар эмтэнэн, инбэлиит буолан, мэтээллэрдээх 1944 сыллаахха төрөөбүт Сахатын сиригэр төннөн кэлэр.
Кэлин үөрэҕин салҕаан, учуутал идэтин ылан Мэҥэ Хаҥалас, Орджоникидзевскай оройуоннар оскуолаларыгар ситиһиилээхтик үлэлиир. 1970-80-сс сылларга ахсыс уонна тохсус кылаастарга саха литературатын учуобунньугун ааптара, элбэх методическай посуобуйаны бэчээттэппитэ.
Покровскай 1-кы №-дээх оскуолатыгар буойун-учууталга үөрэммит-тэрэ Андрей Борисов — РФ норуодунай артыыһа, Наталья Борисова — Саха сирин суруйааччыларын сойууһун чилиэнэ, Людмила Горохова — СӨ үтүөлээх учуутала уо.д.а.
2007 сыллаахтан Иван Николаевич оҕолоро, сиэннэрэ саха тылыгар, литературатыгар ситиһиилэрдээх биһиги оскуолабытын бүтэрээччилэргэ И.Н.Рожин аатынан анал стипендияны анаан туттараллар.
Буойун-учуутал үлэтэ үлэлээбит оскуолатыгар дьоһуннаахтык салҕанар. Биһиги үөрэнээччилэр төрөөбүт Ийэ тылбытынан саҥарабыт, төрөөбүт Ийэ тылбытын таптыыбыт, улууска, өрөспүүбүлүкэҕэ ыытыллар саха тылын олимпиадаларыгар, куонкурустарга ситиһиилээхтик кыттабыт, ытыктанар учуутал Иван Николаевич Рожин аатын түһэн биэрбэппит.
Сайаана ЕРЕМЕЕВА, Покровскай 1-кы №-дээх оскуолатын 8 «а» кылааһын үөрэнээччитэ, «Ыллык» куруһуок чилиэнэ.