Улуу Кыайыы күнүгэр Тумул сүрүн уопсай үөрэхтээһин оскуолатын үөрэнээччилэрэ, чуолаан, «Эрэкэ-дьэрэкэ оҕолор» театральнай куруһуок оҕолоро, Иван Герасимович Иванов-Нуолур Уйбаан «Саллаат оҕото Чооруона» кэпсээнинэн быһа тардан театральнай туруорууну көрдөрдүлэр. Куруһуок салайааччыта алын сүһүөх кылаас учуутала Марфа Борисова буолар.
Чооруона оруолун Егор Максимов, бырабылыанньа бэрэссэдээтэлэ Дайыылап оруолун Альберт Семенов, Сиэнчэ оҕонньору Дима Васильев, Чооруона аҕатын Эрэл Охлопков, Чооруона ийэтин Эйнара Яковлева, эмээхсин оруолун Наташа Пахомова оонньоотулар. Отчуттары уонна холкуостаахтары – алын сүһүөх кылаас оҕолоро. Ааптар тылын Фаина Иванова аахта. Оҕолор бука бары оруолларын бэркэ оонньоон көрдөрдүлэр. Спектакль музыката уонна декорацията театральнай туруорууну ситэрэн-хоторон биэрдэ. Күүс-көмө буолбут төрөппүттэргэ улахан махтал.
Көрөөччүлэр оҕолор оруолларын олус итэҕэтиилээхтик оонньообуттарын бэлиэтээтилэр. «Эрэкэ-дьэрэкэ оҕолор» театральнай куруһуокка сылдьар үөрэнээччилэргэ баҕарабыт үөрэхтэригэр ситиһиини, дьоллоох оҕо сааһы.
Лидия Христофорова, Тумул с.