Дьиэ кэргэн диэн туохха да тэҥнэммэт, сүрэххэ саамай чугас, ытык өйдөбүл. Быйыл дойдубут үрдүнэн Дьиэ кэргэн сыла, өрөспүүбүлүкэҕэ Оҕо саас, улууспутугар Дьиэ кэргэн, оҕо аймах сылларын чэрчилэринэн Төхтүргэ «Саһарҕа» түмсүү салайааччыта Мотрена Ефремова уонна Өктөм нэһилиэгин бэтэрээннэрин сэбиэтин бэрэссэдээтэлэ Николай Константинов көҕүлээһиннэринэн Дьиэ кэргэн күрэҕэ тэриллэн ыытылынна.
Күрэх сүрүн соруга — өбүгэ уонна урукку кэм оонньууларын ыччат дьоммутугар тиэрдии, умнууга хаалан эрэр оонньуулары сөргүтүү. Дьиэ кэргэнинэн ханна баҕар, айылҕаҕа да таҕыстахтарына бу оонньуулары тэрийэн сынньалаҥнарын көхтөөхтүк атаарыахтарын син. Эт-хаан өттүнэн эрчимирэн, кыайыыга дьулуурдаах, тобуллаҕас өйдөөх, сатабыллаах буоларга көҕүлүүр көрүҥнэр. Маннык күрэххэ кыттан дьиэ кэргэн түмсэр. Оҕо төрөппүт тапталын, дьоҕурун, сатабылын көрө-билэ улаатар, олоххо бэлэмнээх буолууга дьулуһар.
Күрэххэ барыта түөрт ыал илин-кэлин түһүстэ. Онньуу олус умсугутуулаахтык, сытыытык, көхтөөхтүк ааста. Үгүс баалы ылан чаҕылхай кыайыыны Татьяна, Кэскил Багдарыын дьэ кэргэнэ ситистэ. Ону сэргэ, көрүҥнэринэн ыллахха, Өктөмтөн элбэх оҕолоох Светлана, Владислав Ксенофонтовтар дартс оонньуутугар кыраҕы харахтаахтарын туоһулаатылар, Сардаана, Виктор Лысовтар «Городки» оонньууну кыайа туттулар, өбүгэ оонньуутугар — хабылык хаамыска хабыыга, өркөн өй, түргэн толкуй оонньуутугар дуобакка эмиэ Татьяна, Кэскил Багдарыыннар дьиэ кэргэннэрэ бастаан таҕыстылар. Элбэх оҕолоох Федотовтар дьиэ кэргэннэрин аҕа баһылыктара байыаннай дьайыыга сылдьарынан ийэлэрэ Светлана Семеновна икки оҕотунаан кэлэн кытынна, кинилэр анал бирииһинэн бэлиэтэннилэр.
Тэрээһиҥҥэ «Хаксык» ТХПК салайааччыта Тамара Осипова спонсордаата уонна нэһилиэк биэнсийэлээхтэрин бэйэ көҥүлүнэн хомуллар усунуостарыттан бириистэр олохтоннулар.
Күрэхпитин чэпчэки атлетикаҕа спорт маастара Владимир Кузьмин, нэһилиэк Бочуоттаах олохтооҕо Елена Герасимова, өр сылларга үөрэҕирии эйгэтигэр үлэлии сылдьар дьоммут Елена, Александр Соломоновтар уонна Өктөм нэһилиэгин Бочуоттаах олохтооҕо Николай Константинов дьүүллүүр сүбэҕэ киирэн сыаналаатылар.
Мотрена Ефремова, «Саһарҕа» түмсүү салайааччыта, Төхтүр с.