“Азия оҕолоро” VIII спортивнай оонньуулары көрсө
“Азия оҕолоро” оонньуулары дьүүллүүр сүбэ арыаллаабыта — Павел Пинигин (кылаабынай судьуйа), Семен Чердонов, Владимир Константинов, Андрей Игнатьев, Степан Павлов, Николай Цыпандин уо. д. а
“Азия оҕолоро” V оонньуулара Д. Е. Глушко былааннаммыт үлэтэ болдьоммут кэмигэр бүппүтүнэн, ыччат политикатыгар министри солбуйааччы Н. В. Паршикова, Олимпиада Азиятааҕы Сэбиэтин вице – призиденэ Гафур Рахимов, Юнеско гуманитарнай уонна социальнай наукаларга салаатын генеральнай дириэктэрэ Пилар Ласо эҕэрдэлээбиттэрэ. Дьэ, ол кэнниттэн Кувейт, Таиланд, Кытай, Монголия, Казахстан, Индия, Россия, Саха сирин бастыҥ спортсменнара, инники эрэллэрэ “Азия оҕолоро” былааҕын күөрэччи таһаарбыттара. Ол кэмҥэ Уус-Алдан “Кэнчээри” ансаамбыла оонньуу гимнин ыллаабыта.
Андаҕар тылларын судьуйалар ааттарыттан Семен Чердонов, кыттааччылартан художественнай гимнастикаҕа норуоттар икки ардыларынааҕы күрэхтэһиилэр призердара Анна Болтаевская эттилэр.
Дьэ, ити кэрэ көстүү сиэрин ситэрэн, “Азия оҕолоро” сандаарар уотун илии быһыылаах дьикти чашаҕа умаппыттара! Киһилээх хайаттан саҕалаан, 197 нэһилиэгинэн эргийэн, 32 тыһыынчаттан тахса биэрэстэни айаннаан, күрэхтэһии уотун чөл олоҕу көҕүлүүр Дмитрий Горохов, Юрий Филиппов, Валерий Куприянов, Олег Попов Дьокуускайга аҕалбыттара уонна Европа үс, Россия алта төгүллээх чөмпүйүөннэригэр Олимпиада боруонса призерыгар Георгий Балакшиҥҥа туттарбыттара. Кини ол күлүмнүүр факелы элбэҕи эрэннэрэр тустуук Максим Заморщиковка биэрбитэ, Максим бочуоттаах сорудаҕын чиэстээхтик толорбута.
Василий МОЖУКОВ, СӨ спордун бэтэрээнэ, Покровскай к.