Оҕо улаатар, ситэр кэмигэр үөрэҕи таһынан интэриэһин, баҕатын, дьарыгын толору хааччыйар сыалтан биһиги 1-кы Дьөппөн санаторнай оскуола-интэринээппит бэрт элбэх, саҥаттан саҥа куруһуоктары, тэрээһиннэри ыытар. Үгэс быһыытынан, үөрэх бүтүүтэ, күөх сайыммытын уруйдуу көрсө оскуола үөрэнээччилэрэ, үлэһиттэрэ саамай сөбүлүүр күрэхпит — туризм Күөнэхтээх диэн кэрэ сиргэ тэриллэр.
Быйылгы туризмҥа 1-кы Дьөппөн санаторнай оскуола-интэринээтин «Адреналин» хамаандата (салайааччылар Михаил Архипов, Иван Михайлов), 1-кы Дьөппөн орто оскуолатын «Ритм» (сал. Айта Сивцева, Варвара Жигалова, Егор Евсеев), 2-с Дьөппөн оскуолатыттан «Пионеры» (сал. Прасковья Сивцева, Мария Протодьяконова), Мэҥэ Хаҥалас улууһун Ороссолуодатыттан «Росток» (сал. Александра Пономорев, Александра Александрова), Хачыкаат оскуолатын «Урааҥхайдар» (сал. Дьулустаан Филиппов, Анастасия Федорова), Кыһыл Үрүйэттэн «Алые Паруса» (сал. Вячеслав Герасимов, Людмила Артамонова) хамаандалар кытыннылар.
Хас биирдии хамаанда бэйэлэрин билиһиннэрдилэр, туристическай үөрүйэххэ, суһал көмөнү оҥорууга, спортивнай ориентированиеҕа, бырайыак көмүскээһинигэр кыахтарын, билиилэрин тургутустулар. Түһүмэх аайы эппиэтинэстээх салайааччылар ананан кыттааччылары кыраҕатык сыаналаатылар. Ол курдук, туризмҥа Лада Барашкова, Иван Михайлов, спортивнай ориентированиеҕа Михаил Архипов, Афанасий Скрябин, бырайыак көмүскээһинигэр Сардаана Борисова, Майа Кириллина, туристическай үөрүйэххэ Ирина Дягилева, Иван Михайлов үлэлээтилэр. Хамаандалар бэйэлэрин билиһиннэриилэрин Виктория Федорова бэлэмнээтэ, медицинскэй ыстаапка Зинаида Сыромятникова, Майа Кириллина үлэлээтилэр, волонтердары иитээччилэр Мария Солдатова, Кристина Маркова салайдылар.
Туризм кыттыылаахтарын өр сылларга поварынан үлэлии сылдьар минньигэс астаах Валентина Попова, иитээччибит Наталья Яковлева миин, чэй өрөн аһаттылар, кинилэргэ оҕолор, үлэһиттэр көмөлөстүлэр. Оскуолабыт бары үлэһиттэрэ биир киһи курдук түмсэн, сүүрэн-көтөн тэрээһиммит үрдүк таһымнаахтык ааста.
Сылтан сыл араас хабааннаах күрэхтэһиилэргэ оҕолорбут ситиһиилэрэ, көрдөрүүлэрэ үрдээн иһэр. Бу да күн оҕолор бастыырга дьулуурдаахтара харахха быраҕылынна. Ол курдук, биһиги «Адреналин» хамаандабыт сымса сүүрүк кыыһа, 7 кылаас үөрэнээччитэ Милана Алексеева, медицинскэй түһүмэххэ 6 кылаастан Глеб Григорьев тэҥнээхтэрин булбатылар, уолаттарбыт Артем Копырин (9 кылаас), Игнат Докторов (8 кылаас) бастыҥ көрдөрүүлэринэн барыбытын сөхтөрдүлэр.
Сыралаах киирсии түмүгүнэн Артем Копырин хамандыырдаах «Адреналин» хамаанда бастаата, 2-с миэстэ ыаллыы оскуолабытыттан «Пионеры» буоллулар уонна 3-с миэстэҕэ «Ритм» хамаанда, 4-с миэстэҕэ Хачыкаат оскуолатын «Урааҥхайдара» тигистилэр.
Оҕолорбут бу күн бэйэ-бэйэлэрин кытта билсиһэн, үөрэн-көтөн, оонньоон-көрүлээн тарҕастылар.
Хорсун-хоодуот ыччаппытыгар, ыраас ыра санаалаах салайааччыларга кэлэн ыалдьыттаан, үөрүүбүтүн үллэстибиккитигэр, күрэххэ кыттан күүскүтүн, уҕараабат дьулуургутун көрдөрбүккүтүгэр барҕа махталбытын тиэрдэбит. Саҥаттан саҥа ситиһиилэри, сонунтан сонун арыйыылары, ыччаккыт ситиһиилэринэн кынаттанан, үлэҕит түмүктээх буоллун!
Анастасия Мордовская, Тиит Эбэ с.