Өктөм нэһилиэгин историята — хартыынанан

Покровскай куоракка Н.М. Засимов аатына Хартыына галереятыгар Өктөм нэһилиэгин «Арылы кустук» худуоһунньуктар түмсүүлэрэ тэриллибиттэрэ 5 сылыгар  анаммыт «О прошлом — для будущего на холсте художника» диэн ураты ис хоһоонноох быыстапка арылынна.

Быыстапкаҕа Тыгын үйэтиттэн саҕалаан билиҥҥи кэмҥэ диэри Өктөм нэһилиэгин историятын, дьонун-сэргэтин туһунан уон самодеятельнай худуоһунньук 162 хартыыналарыгар дьүһүйбүттэрэ кэлбит дьон болҕомтотун тарта. «Арылы кустук» худуоһунньуктар түмсүүлэрин Өктөм оскуолатын учуутала Любовь Габышева бэһис сылын салайан дьарыктыыр.

Улуу Эркээни хочотун уонна  Өктөм нэһилиэгин историята  норуокка, чуолаан эдэр көлүөнэҕэ, уруһуй нөҥүө кэбэҕэстик тарҕанарын туһугар туруулаһан дьарыктаналлар нэһилиэк талааннаах дьоно Анатолий Лиханов, Раиса Охлопкова, Любовь Габышева, Иванна Слепцова, Андриан Белолюбский, Иван Христофоров, Оксана Филиппова, Вера Алексеева, Варвара Шевелева. Хара маҥнайгыттан кинилэргэ сөптөөх литератураны, араас сэдэх матырыйааллары көрдөөн, булан биэрэр истиҥ сүбэһитинэн, көмөлөһөөччүнэн буолар олохтоох бибилэтиэкэр Мотрена Павлова.

Тарбахтарыгар талааннаах, туох да үлэттэн толлон  турбатэлбэх оҕолоох ийэлэр, аҕалар, үгүс сиэннэрдээх эбээлэр, эһээлэр тустаах үлэлэриттэн  быыс булан, сылтан сыл аайысаҥа бырайыактары олоххо киллэрэр дьиҥнээх улууспут патриоттара. Ол курдук,  2023 сыллаахха Үлэ сылыгар анаан төрөөбүт нэһилиэктэрин уордьаннаах туруу үлэһиттэрин мөссүөннэрин түһэрэн 20-тэн тахсахартыынаны уруһуйдаабыттарын сөҕө-махтайа, киэн тутта көрдүбүт. Үгүс үлэ биир дойдулаахпытыгар, хаҥаластар чулуу уолбутугар, Саха сирин бастакы президенигэр Михаил Николаевка анаммыт.

Түмсүүгэ дьарыктанар талааннаах дьоммут биир киһи курдук сүбэлэрин холбоон, олоҕу кытта тэҥҥэ хардыылаан Хаҥаласпыт баай историятын  үөрэтэн билэн, дьоммут-сэргэбит  ааттарын, историябытын үйэтитэн көрдөрөн иитэр-үөрэтэр үлэҕэ, кыраайы үөрэтиигэ олус элбэҕи айа-тута, үлэлии-хамсыы сылдьаллар.  

Галина Семенова.