Айылҕа бэлэҕэ
Эн кэрэ куолаһыҥ күөрэгэй ырыата,
Долгуйар сүрэхпин уоскутар сылааһа.
Соһуйан истиэҕэ дойдубут күөх тыата,
Тыалынан көтүһэн мунчаарбыт алааһа.
Куолаһыҥ эйиэнэ айылҕа бэлэҕэ,
Киниттэн ууллуоҕа таас киһи сүрэҕэ!
Эн нарын куолаһыҥ үүннэрэр бурдугу,
Былыттаах халлааҥҥа таһаарар кустугу.
Сибэкки буолан мин хонууга тыллабын,
Чүмэчи курдук түүн сандааран ууллабын.
Куолаһыҥ эйиэнэ айылҕа бэлэҕэ,
Сүрэхпин уоскутар долгуйбат үрэҕэ!
Сэгэриэм
Билигин сэгэриэм аттыбар эн суоххун,
Ынырык ахтабын мин хойуу суһуоххун,
Хараҥа хараххын, долгутар куоласкын,
Эргитэ кытаанах эрэллээх суобаскын.
Олоххо сүбэлээн—амалаан быыһыыгын,
Таптыыбын, арааһа, эйэҕэс быһыыгын,
Чуумпуга кистэлэҥ санааҕын этэргин,
Уотунан умайар чаҕылхай мичээргин.
Эн миэхэ көстөҕүн үөрэммин күлэрбэр,
Олуһун кэлэҕин минньигэс түүллэрбэр,
Инники дьылҕабар эн күндү кэһиигин,
Куруутун, сэгэриэм, саныыбын эйиигин.
Гаврил Адамов, Покровскай 1-кы №-дээх оскуолатын 10 «а»кылааһын үөрэнээччитэ.
Фото: Ольга Кириллина