Дьарыктаах буолуу
Нэһилиэнньэ дьарыктаах буолуутун киинэ үлэтэ суох буолан учуокка турбут дьон үлэ булалларыгар көмөлөһөр, ону таһынан, сөптөөх үлэ көстүбэтэҕинэ, атын идэҕэ үөрэттэриэн сөп эбэтэр бэйэ дьыалатын тэринэргэ санаммыт дьоҥҥо финансовой өйөбүл оҥорор.
Хаҥаластааҕы Дьарыктаах буолуу киинэ иһитиннэрбитинэн, дьону дьарыктыырга төһүү күүһүнэн бэйэ дьыаланы арыныыга субсидия көмөтө буолар. Ол эбэтэр, учуокка турбут киһи бэйэ дьыалатын арынар баҕалаах буоллаҕына, анал хамыыһыйаҕа бизнес-бырайыак көмүскүүр, урбаанньыт быһыытынан регистрацияланар уонна, өскөтүн куонкуруһу аастаҕына, дьыала тэринэригэр судаарыстыбаттан субсидия ылар. Биһиги улууспутугар «Содействие занятости населения Республики Саха (Якутия)» судаарыстыбаннай бырагыраама чэрчитинэн биир кэмнээх өйөбүлү ылбыт дьон аҕыйаҕа суох. Ол курдук, 2023 сылга — 15, быйыл 4 үлэтэ суох киһи туһанна. Ордук косметическай-парикмахерскай, кондитерскай, тиэхиньикэ өрөмүөннүүр өҥөнү толорууга дьон бизнес-былаан оҥостор эбит. Ону сэргэ, сылгы иитиитигэр, маһынан-тимиринэн уһаныыга уо.д.а. бырайыактаах дьон бу харчынан көмөнү ылан бэйэ дьыалаларын тэриммиттэр.
Быйыл Покровскай олохтооҕо Надежда Захарова маннык финансовай өйөбүл ылан улуус киинигэр нэһилиэнньэҕэ сонун өҥөнү толорор буолла – 7 миэстэлээх хостел арыйан үлэлэттэ. Саҥа хостел куорат киинигэр турар, онон кэлээччилэргэ-барааччыларга олус табыгастаах.
— Бэйэм өр сыл социальнай эйгэҕэ үлэлээбит киһибин. Ааспыт сыл алтынньытыгар үлэтэ суох хаалан Дьарыктаах буолуу киинигэр учуокка турбутум. Манна испэсэлиистэр бэйэ дьыалатын тэринэргэ өйөбүл баарын сиһилии быһаарбыттара, бырайыакта толкуйдаа диэн сүбэлээбиттэрэ. Куонкурус ирдэбилинэн урбаанньыт буолуохтааххын, онон бастатан туран, «Мой бизнес» тэрилтэ нөҥүө бэйэ дьарыктаах буолбутум, онтон урбаанньыт быһыытынан регистрацияламмытым. Эрдэттэнманнык хостел үлэлэтэр баҕа баара, онон ыра санаабынолоххо киллэрэргэ санаммытым. Бизнес-былааммын ситиһиилээхтик көмүскээн, 150 тыһ. солкуобай көмө ылан,бу муус устарга командировкалаахтары олохтуурга туһуламмыт хостел арынным. Билигин үс уонна түөрт утуйар миэстэлээх икки хостоохпун, кыһынын биир массыына турарыгар гараас баар.
Хостелбыт дьиэтин эрдэ кэргэмминээн Аркадий Христофоровичтыын бэйэбит күүспүтүнэн туттубуппут.Бизнес-былааммын көмүскүөм иннинэ бу дьиэбитинкыралаан өрөмүөннээн саҕалаабыппыт. Сонун дьыаланы ылсарбар дьиэ кэргэним өйөбүлэ улаханнык көмөлөстө. Тус бэйэм Дьарыктаах буолуу киинин испэсэлиистэригэр сүбэ-ама иһин махтанабын уонна үлэтэ суох дьон олорон хаалымаҥ, билиҥҥи кэмҥэ быыс-хайаҕас элбэх, судаарыстыбаттан өйөбүл баар, ону кэмигэр туһаныҥ, үлэлээҥ-хамнааҥ диэн сүбэлиибин. Бэйэ дьарыктаах буолуу үтүө өрүтэ элбэх диэн бэлиэтиэм этэ. Ол курдук, киһи күннээҕи бириэмэтин бэйэтэ аттарар. Холобура, биһиги оҕобут бастакы кылааска үөрэнэр, кинини илдьэргэ-аҕаларга бириэмэ наада, өскөтүн тэрилтэҕэ үлэлиирим буоллар кэлэр-барар ыарахаттардаах буолуо этэ. Оттон билигин дьиэ кэргэммэр, сөбүлүүр үлэбэр хаһан баҕарар бириэмэ, быыс булабын, — диэн Надежда Афанасьевна санаатын үллэһиннэ.
Ольга Гермогенова.