Киһи сааһыран истэҕин аайы кыра да үлэни кыайбат буолар эбит. Миэхэ маннык түгэҥҥэ элбэхтэ күүс-көмө буолбут Сиинэ орто оскуолатын быйылгы выпускниктара буолаллар. Быйыл оскуоланы 4 үөрэнээччи – икки кыыс, икки уол бүтэрэллэр. Бары оскуола, нэһилиэк общественнай олоҕор олус көхтөөхтөр. Оҕолор кылаас салайааччылара Оксана Васильевна Семенова. Мин бүгүн хаһыат нөҥүө бу иллээх-эйэлээх кылаас оҕолоругар дириҥ махталбын тиэрдиэхпин баҕарабын.
Алтыс кылаастан саҕалаан бу оҕолор миэхэ дьиэтээҕи үлэбэр куруук көмөлөһөн кэллилэр. Саас аайы маспын хайытан, саһааннаан, кыһын устата тиэргэммин күрдьэн, күһүҥҥү үлэҕэ илии-атах буолан улаханнык абырыыллар.
Кырдьаҕаска-кыаммакка куруук көмөлөһөр үтүө майгылаах буоларга, биллэн турар, төрөппүттэрэ уонна учууталлара иитэллэр. Онон истиҥ махталбын оҕолор төрөппүттэригэр уонна учууталларыгар тиэрдэбин. Үтүө санаалаах, амарах сүрэхтээх оҕолорбор экзаменнарыгар ситиһиини, инники олохторо сырдык, ыраас буоларыгар алгыспын аныыбын. Бары чэгиэн-чэбдик сылдьыҥ, баҕа санааҕыт туола турдун!
Альбина САМСОНОВА, тыыл, үлэ бэтэрээнэ, Сиинэ нэһилиэгин олохтооҕо.