(“Азия оҕолоро” V-с спортивнай оонньуулар 2012 сыл от ыйын 4-16 күннэригэр Дьокуускай-Мирнэй-Нерюнгри куораттарынан ыытыллыбыттара)
“Азия оҕолоро” V-с спортивнай оонньуулара Дмитрий Глушко былааннаммыт үлэтэ болдьоммут кэмигэр бүппүтүнэн, ыччат политикатыгар миниистри солбуйааччы Наталья Паршикова, Олимпиада Азиятааҕы Сэбиэтин вице – президенэ Гафур Рахимов, Юнеско гуманитарнай уонна социальнай наукаларга салаатын генеральнай дириэктэрэ Пилар Ласо эҕэрдэлээбиттэрэ. Дьэ, ол кэнниттэн Кувейт, Таиланд, Кытай, Монголия, Казахстан, Индия, Россия, Саха сирин бастыҥ спортсменнара, инники эрэллэрэ“Азия оҕолоро” былааҕын күөрэччи таһаарбыттара. Бу кэмҥэ Уус Алдан “Кэнчээри” ансаамбыла оонньуу гимнин ыллаабыта.
Андаҕар тылларын судьуйалар ааттарыттан Семен Чердонов, кыттааччылартан художественнай гимнастикаҕа норуоттар икки ардыларынааҕы күрэхтэһиилэр призердара Анна Болтаевская эппиттэрэ.
Дьэ, ити кэрэ көстүү сиэрин ситэрэн, “Азия оҕолоро” сандаараруотун илии быһыылаах дьикти чашаҕа умаппыттара! Киһилээх хайаттан саҕалаан, 197 нэһилиэгинэн эргийэн, 32 тыһыынчаттан тахса биэрэстэни айаннаан, күрэхтэһии уотун чөл олоҕу көҕүлүүр Дмитрий Горохов, Юрий Филиппов, Валерий Куприянов, Олег Попов Дьокуускайга аҕалбыттара уонна Европа үс, Россия алта төгүллээх чөмпүйүөннэригэр, Олимпиада боруонса призерыгар Георгий Балакшиҥҥа туттарбыттара. Кини ол күлүмнүүр факелы элбэҕи эрэннэрэр тустуук Максим Заморщиковка биэрбитэ, Максим бочуоттаах сорудаҕын чиэстээхтик толорбута.
Спорт 18 көрүҥэр Россияттан 8 хамаанда уонна Азия 26 дойдутуттан2042 спортсмен кыттыбыта. Ону таһынан инбэлиит оҕолор көҥүл тустууга уонна пауэрлифтиҥҥэ күрэхтэспиттэрэ.
“Триумф” спортивнай киинигэр, “Дохсун” футболлуур тутууларыгар күрэх ыытыллыбыта, 292 мэтээл кэмпилиэгэ оонньоммута.
Бастакы миэстэлээх Саха сирин – 1-кы хамаандата 102 мэтээли — 40 кыһыл, 25 үрүҥ көмүһү, 37 боруонса мэтээли ылбыттара. Саха сирин 2-с хамаандата 56 мэтээли — 9 кыһыл, 24 үрүҥ көмүһү, 23 боруонсаны ылбыта. Иккис миэстэҕэ 86 мэтээллээх Сибиирдээҕи федеральнай уокурук хамаандата 30 кыһыл, 26 үрүҥ көмүһү, 30 боруонсаны илдьэ барбыта. Үһүскэ Казахстан тахсыбыта — 70 мэтээли, ол иһигэр 19 кыһыл, 16 үрүҥ көмүһү, 35 боруонсаны дойдутугар илпитэ.
Василий МОЖУКОВ, СӨ спордун бэтэрээнэ, Покровскай к.