А.С. Данилова аатынан “Барҕарыы” култуура киинин тэрийиитинэн бастакы Президеммит М.Е.Николаев архыып-библиотекатыгар бүтүн Өрөспүүбүлүкэ үрдүнэн ыытыллар хоһоон айааччылар күрэхтэрин түмүгүнэн быйылгы дьылга тахсыбыт 4 кинигэ — “Кэлэр сыл кэрэни түстээтин”, «Күн оҕолоро», “Таптал нарын иэйиитэ”, «Дьээбэ-хообо» сүрэхтэниилэрэ буолан ааста. Өрөспүүбүлүкэ араас улуустарыттан уус тыллаахтар, саха тылын дэгэтин күнү аайы тутта, туһана сылдьар хоһоон айааччылар мустан улахан түһүлгэни тэрийдилэр.
Кинигэлэри хомуйан, наардаан бэчээккэ бэлэмнээбит Саха Өрөспүүбүлүкэтин култууратын туйгуна, «Гражданскай килбиэн» бэлиэ хаһаайына, Өктөм нэһилиэгин бочуоттаах олохтооҕо Зоя Аржакова ыалдьыттары кинигэлэр сүрэхтэниилэринэн истиҥник эҕэрдэлээтэ уонна Өктөмнөөҕү норуот тыйаатыра ыытар өрөспүүбүлүкэтээҕи хоһоон айааччылар күрэхтэригэр мэлдьи кыттар дьоҥҥо махталын биллэрдэ.
“Барҕарыы” култуура киинэ уонна Өктөмнөөҕү норуот тыйаатыра хамсык кэмигэр үлэлэппитэ бырайыага бу күҥҥэ диэри олус таһаарыылаахтык үлэлиир. Хоһоон айыытын күрэстэригэр олус элбэх киһи кыттан, онтон кынат ылан аны кинигэ таһаарарга Зоя Егоровна ылсан 30-тан тахсакинигэ күн сирин көрдө. Аҥардас бу сылга, бүгүҥҥү туругунан, 5 кинигэ таҕыста.
2024 сылга бастакынан тахсыбыт “Кэлэр сыл кэрэни түстээтин” кинигэни Өлүөхүмэ улууһун, Кыыллаах Арыы нэһилиэгин бочуоттаах олохтооҕо Мария Поскачина, “Таптал нарын иэйиитэ” кинигэни Ньурба улууһун Чукаар нэһилиэгин олохтооҕо Маргарита Егорова, “Күн оҕолоро” кинигэни Усуйаана улууһун Хаһааччыйа нэһилиэгин олохтооҕо, «Кэнчээри» оҕо уһуйаанын иитээччитэ Анастасия Милютина – Мичээрэ, «Дьээбэ-хообо» кинигэни Россия уопсай үөрэхтээһинин бочуоттаах үлэһитэ, Саха Өрөспүүбүлүкэтин үөрэҕириитин туйгуна, Таатта улууһуттан Зоя Санникова Зоя олус истиҥник, дириҥ ис хоһоонноохтук ырытан мустубут дьону астыннардылар.
Араас улуустан кэлбит хоһоон айааччылар «Кэрэ эйгэ» бөлөх салайааччытыгар Зоя Егоровнаҕа махтанан, сүгүрүйэн туран киниэхэ анаан “Кэрэ киһиэхэ Туйаараҕа”диэн анабыл кинигэ таһаарбыттара олус долгутуулаах уонна үөрүүлээх буолла.
Дьэ кырдьык, маннык кэрэ дьоннор араас улууска айа-тута, хомоҕой хоһоон хонуутугар көтө-дайа сылдьаллара киһини эрэ үөрдэр, астыннарар. Талааннаах дьоммутугар айымньылаах үлэни, тус олохторугар дьолу-соргуну баҕарабыт!
Федора Фомина, Өктөм с.